س جروب العيله
وقفتها قبل ما تمشي
— آية
بصتلي
— نعم يا ماما؟
— أنا عايزاكي تقعدي معايا شوية
اتوترت
وقعدت قدامي
قلت لها:
— ليه ما سألتيش أنا حاسة بإيه قبل ما تقرري إني محتاجة حد؟
دموعها بدأت تلمع
— لأني خفت
— خفتي مني؟
— لا يا ماما… خفت أخسرك
الكلمة دي خلتني أسكت
كملت:
— أنا فقدت بابا وأنا صغيرة وشوفتك بتقفي على رجلك لوحدك عشان تربيّني… ومش قادرة أتخيل اليوم اللي أكون فيه مش عارفة أساعدك
مسكت إيدها
— يا آية أنا أمك… مش طفلة
نزلت دموعها
— عارفة يا ماما
بس بعدها قالت جملة خلتني أحس إن فيه حاجة ناقصة
— بس فيه حاجة حصلت ومش عارفة أقولك عليها
بصيتلها باستغراب
— حاجة إيه؟
سكتت
وبعدين طلعت موبايلها
وفتحت صورة كانت مخبياها
ناولتهالي
بصيت للشاشة…
وفجأة حسيت إن الأرض اتحركت من تحتي
لأن الصورة كانت ليا…
وفيها حاجة أنا نفسي ما كنتش واخدة بالي منها.
مسكت الموبايل من إيد آية وأنا مش فاهمة هي عايزاني أشوف إيه
الصورة كانت متصورة من بعيد
كنت أنا قاعدة في المطبخ
وفوق الترابيزة كان فيه علبة الدوا بتاع الضغط
وكوباية الميه
وعلى وشي كان باين التعب
بصيتلها باستغراب
— إيه ده يا آية؟
نزلت عينيها في الأرض وقالت:
— دي من كام أسبوع
— وإنتي كنتي بتصوريّني؟
— لا يا ماما… أنا كنت خايفة عليكي
فضلت ساكتة
لأن اللي وجعني مش الصورة
اللي وجعني إن بنتي بدل ما تيجي تقعد جنبي وتسألني: مالك؟
كانت بتراقبني من بعيد
قالت بسرعة:
— ماما أنا عارفة إنك زعلتي بس أنا كنت محتارة أعمل إيه
— تعملي إيه؟ تسأليني يا آية
رفعت عينيها وبصتلي
— أنا بخاف أفقدك زي ما فقدت بابا
الجملة دي كسرت كل الغضب اللي جوايا
قعدت جنبها
وقلتلها:
— يا بنتي أنا مش ضد إنك تخافي عليا… بالعكس ده بيفرحني
بس اللي وجعني إنك خليتيني أحس إني بقيت حمل عليكي
دموعها نزلت
— أنا آسفة يا ماما
— وأنا كمان يمكن غلطت
بصتلي باستغراب
— غلطتي في إيه؟
ابتسمت بحزن
— غلطت إني كنت بحاول أثبتلك طول الوقت إني لسه قوية ومحتاجة أساعدكم… لدرجة إني نسيت أقولك لما أتعب
سكتنا إحنا الاتنين
ولأول مرة من فترة طويلة اتكلمنا من غير خوف ولا عصبية
حكيتلها إني فعلًا بقيت بنسى حاجات بسيطة أوقات
وإن جسمي مبقاش زي زمان
لكن ده مش معناه إني خلاص مقدرش أعيش أو أعتني بنفسي