سكرتيرة ولكن

الفصـــل الســآبــــــــع عشــــــــر

فوقت لاقيت سيف وداليا جمبي وانا ع السرير .. لاقيت غصب عني دموعي بتنزل مني ومسكت في داليا اوي وبدأت اعيط واترعش .. لاقيت داليا بتطبطب عليا وتقولي اهدي يا نادين اهدي ايه اللي حصل
لاقيت سيف بيقولي ايه اللي حصل يا نادين
قعدت اعيط واقوله انا عايزة امشي انا عايزة اسافر
قالي حاضر بس اهدي مش كده فهميني بس ايه اللي حصل
مقدرتش اتكلم ولا اقول اي حاجة غير اني بس عماله اعيط
لاقيت سيف بيقول قومو حضروا حاجتكم هنسافر دلوقتي
قومت حضرت حاجتي وانا فعلا مش قادرة اتحرك من مكاني كانت داليا بتساعدني
ركبنا العربيه بس خالد مكنش معانا ومحاولتش اهتم بس داليا سالت سيف عليه وقالها انه هيجي لوحده
سيف كان متضايق اوي علشاني .. وكان كل شويه يبص عليا من مرايه العربيه .. وانا مكنتش بعمل حاجة غير اني بعيط من غير صوت .. كانت صعبانه عليا نفسي اوي .. حسيت ان كرامتي انجرحت من انسان حقير زي ده
بس سيف تعب ووقف العربيه .. وقالنا هننزل نقعد شويه في الاستراحة دي
بجد مكنتش قادرة نزل هو وداليا بس انا فضلت في العربيه .. قعدت اعيط كل ما افتكر كلام خالد ليا .. مش عارفه انا عملتله ايه علشان يقولي الكلام ده .. انا مأذيتهوش ولا عمري جرحته علشان يجرحني كده .. مش ذنبي اني مليانه هو ميعرفش ده من ايه .. ما ممكن يكون مرض ولا ممكن يبقي عامل وراثي .. هو مالوش انه يتدخل فيا ولا في شكلي .. ليه قالي كده .. ليه جرحني كده .. قعدت استغفر وادعي ربنا كتير .. وفي لحظة حسبنت عليه بس سيبته منه لربنا هو بس اللي قادر ياخدلي حقي
رجع سيف وداليا العربيه وسيف جابلي ميه وعصير وقالي اشربيهم يانادين يهدوكي
مشربتش حاجة ومعملتش حاجة مكنتش عايزة اي حاجة من الدنيا غير ان الناس تسيبني في حالي .. انا بجد كنت تعبانه من الناس وزهقت منهم وبعدي عنهم كان راحة كبيره ليا .. انا لو كنت اعرف ان كل ده هيحصلي مكنتش فكرت اني اشتغل
بس في لحظة افتكرت سيف وحبي ليه اللي غيرلي حياتي .. بس كنت تعبانه مش قادرة حتي افكر في حاجة
بعد شويه لاقيت سيف بيقولي نادين فين بيتك علشان اوصلك
قولتله حضرتك نزلنا عند الشركة واحنا هنتصرف
قالي يا بنتي مش هينفع اللي انتي بتقوليه ده
لاقيت داليا بتقوله لا معلش يا استاذ سيف حضرتك وصلنا بس عند الشركة انا هوصل نادين
طب ليه يا داليا انا هوصل نادين وبعدين اوصلك
لاقيت داليا بتقوله لاء معلش يا استاذ سيف لاني مش هقدر اركب مع حضرتك لوحدي
بجد فرحت اوي بداليا وبرغم حزني وتعبي الا اني حسيت اني عملت حاجة قيمة لاني خليت داليا تعرف الحرام والحلال وتاخد بالها من تفاصيل صغيره مكنتش بتاخد بالها منها
لاقيت سيف بيقولها حاضر بس لما توصلو البيت لازم تطمنوني عليكم
قولناله حاضر
وصلنا سيف عند الشركة وجت داليا وصلتني لحد البيت ومشيت
طلعت البيت كنت حاسه اني مجهده جدا ومرهقه .. دخلت البيت وسلمت ع بابا وماما ودخلت اوضتي ونمت .. مكنتش مستحمله حد يقولي مالك ولا فيكي ايه .. اتصلت باستاذ سيف وطمنته عليا وقالي انه مستنيني بكرة في الشركة
قفلت معاه ونمت محستش بنفسي من شده التعب والارهاق والتفكير .. فضلت ع الحال ده يومين مش بعمل حاجة غير اني نايمة كنت بس بقوم اصلي وارجع انام تاني .. ماما كانت بتسالني مالك كنت بقولها عندي برد من جو اسكندريه حتي لما قالتلي مروحتيش الشغل ليه كدبت عليها وقولتلها ان استاذ سيف مديني اجازه
كان سيف بيتصل بيا بس مكنتش برود عليه .. بجد مكنتش قادرة حتي اني اتكلم مع حد .. كنت محتاجة ابعد فتره عن كل حاجة .. حتي سيف كنت محتاجة ابعد عنه .. قلبي وجعني ومبقتش قادرة استحمل .. كل تفكيري انحصر في ان محدش هيبصلي حتي سيف مش شايفني غير اني سكرتيره شاطرة وبس .. كنت لازم ابعد علشان اقدر اكمل طريقي وابطل احبه ..
استعنت بالله وقولت اني هسيب سيف لوجه الله علشان ارضي ربي .. ولو سيف نصيبي هيجيلي لحد عندي .. حاولت اقاوم احساسي باليأس وارجع تاني .. ورجعت اقوي من الاول بس كان دايما كلام خالد قدامي اداني دافع اني اهتم بنفسي واداني ارادة علي اني لازم اخس .. علشان اكون دايما واثقه من نفسي ومسمحش لاي مخلوق يهز ثقتي في نفسي مرة تانيه
رجعت شغلي بعد غياب دام 3 ايام .. كنت صحيح راجعه قويه من بره بس من جوايا انسانه هشه ضعيفه .. بس كان لازم اقوي نفسي من تاني من جوه بقربي من ربنا
روحت الشركة واتعاملت عادي زي كل يوم شويه ولاقيت سيف داخل وبيقولي ازيك يا نادين حمد الله ع السلامة
قولتله بدون اي مشاعر الله يسلمك
قالي لو سمحتي عايزك في مكتبي
دخلتله مكتبه وقالي اتفضلي اقعدي يا نادين ولو سمحتي عايز اعرف بالظبط اللي حصل بينك وبين خالد وايه اللي خلاكي تضر….بيه بالقلم
قولتله باستغراب وحضرتك عرفت منين كل ده
قالي انا كنت واقف في البلكونه وشوفتكم ولما شوفتك وانتي راجعه بتجري قلقت عليكي ولما سمعت داليا وهي بتنادي عليا فتحت الباب بسرعه اشوف ايه اللي حصل لاقيتك واقعه مغم عليكي ممكن تفهميني ايه اللي حصل بالظبط
بدأت عيوني تدمع كل ما افتكر الموقف وحكيت لسيف كل كلام خالد ليا
لاقيت سيف بيقولي انا اسف يا نادين علشان مقدرتش احميكي من واحد زي ده بس حقك هيرجعلك .. متحطيش كلام خالد في دماغك انتي اي انسان يتمناكي انتي جوهره غاليه اوي وغبي اللي يفرط فيكي
بالرغم كل التعب اللي جوايا بس فرحت من كلام سيف .. انا بشر وانسانه بفرح لما اسمع كلمة نابعه من القلب وخاصه لما تكون خارجة من قلب زي قلب سيف
لاقيت سيف بيقولي ارجوكي متزعليش وحقك انا اللي هاخدهولك
قولتله حقي عند ربنا واللي جرحني قادر ربنا يردله القلم اتنين
روحت قعدت علي مكتبي وجت داليا سلمت عليا واطمنت عليا وقالتلي حمد الله ع السلامة
داليا اتغيرت اوي حتي طريقه لبسها ومكياجها بقيت انسانه مختلفه .. وشها بقي فيه نور جميل وبقي هادي وصافي .. بجد كنت فرحانه اوي بيها انها اتغيرت كده .. داليا بتحب مصطفي بجد وانا قررت اني اساعدها لازم توصل لقلب مصطفي
خالد جه وسيف طلبه في مكتبه ودخله خالد وهو بيبصلي نظرة كلها غضب .. مسمعتش بينهم حاجة خالص بس صوتهم كان عالي وشويه ولاقيت خالد خارج والغضب ماليه
دخلت لسيف بسرعه قولتله ايه اللي حصل
قالي يتحرق الشغل انا اللي يهمني هو الاحترام وهو محترمنيش ولا احترم زميلته يبقي مالوش مكان هنا
قولتله يعني ايه
قالي اديته حسابه خالد مالوش مكان هنا
بجد حسيت بالحزن انا عمري ما اتعودت اكون سبب في اذيه حد وده قطع عيش ممكن يكون محتاج الشغل انا معرفش ظروفه ايه
قولت لاستاذ سيف بس ده قطع رزق وانا ما احبش اكون السبب في اذيته
قالي هو اللي اذي نفسه مش انتي اللي اذتيه .. انا ممكن اقلب الدنيا ولا ان حد يأذيكي يا نادين وقالي بابتسامة يلا بقي انا بقالي 3 ايام مشربتش قهوه
قولتله حاضر
روحت عملتله القهوه وقعدت افكر هو ليه كل ما اقرر ابعد عنه حاجة تحصل تخليني اتعلق بيه اكتر معقول يكون ربنا عايز يقولي انه نصيبك ومش هتبعدي عنه ابدا
بجد التفكير زاد اوي في سيف وقولت لازم ابقي جمب سيف واساعده

الفصــل الثــآمــن عشـــــــر

الايام كانت بتمر وكانت علاقتي بسيف بتزيد .. وهو كمان كان بيقرب مني بشكل كبير .. انا وسيف مابقناش بنقدر نبعد عن بعض .. حتي وانا في البيت بقي بيتحجج باي حاجة علشان بس يكلمني في التليفون .. بصراحة انا كمان بقيت بستعبط وبكلمة كتير .. كان دايما عندي احساس قوي ان سيف بيحبني .. من كلامة ومن اسلوبه واهتمامه .. بس مش عارفه ليه سيف مش راضي يتكلم .. هل مستني يتأكد من مشاعري ولا مستني ايه .. مكنتش عارفه حاجة غير اني كنت فرحانه حاولت اعرف ايه اللي بين ضحي وسيف بس للاسف مكنتش بقدر افتح الموضوع ده لان لو جت سيره من بعيد او من قريب كان بيتضايق واعتقد ان الازمة اللي عند سيف سبب الخلاف اللي بينه وبين ضحي
اما داليا بقي فتغيرت 360 درجة بقيت انسانه تانيه خالص .. بتحافظ علي صلاتها وعلي طول ماسكه مصحفها في وقت فراغها .. حتي لما بتدخل لسيف علشان شغل لازم الباب يبقي مفتوح .. مبقتش بتضحك مع حد ولا تعلي صوتها مع حد بقي عنوانها هو حيائها .. انا وداليا قربنا من بعض اوي وبقينا اكتر من اصحاب .. مصطفي اول ما شافها انبهر بيها مش هقول حبها بس ع الاقل شوفت في عنيه نظرة اعجاب بيها بتدينها وباخلاقها مش بلبسها ولا مظهرها .. داليا معدنها حلو اوي من جوه بس للاسف اللي كانت عاملاه في نفسها مكنش بيخلي حد يشوفها من جواها .. في مرة سيف بعتلنا احنا الاتنين ووقفنا قدامه وقالنا كلمه اعتقد ان احنا مستحيل ننساها
سيف قالنا انا فخور بيكم اوي ياريت البنات كلها تبقي زيكم في احترامكم والتزامكم وتدينكم
اما مصطفي بقي بيجي الشركة كتير اوي مش عارفه بقي قلبه دق ولا ايه
حياتنا كانت جوه الشركة اسريه اوي كنا كلنا قريبين من بعض ومفيش حاجة اسمها رئيس ومرئوس بالعكس سيف كان بيعاملنا كويس اوي حتي لو كان فيه شغل متأخركان بيجيبلنا غدا وناكل كلنا سوا
كانت الايام بتمر علينا وكانت الحياه حلوة اوي في الشركة .. وانا كمان بقيت ثقتي بتزيد في نفسي لان وزني كان بينزل اقدر اقول ان انا راضيه عن نفسي حتي داليا خدت بالها وقالتلي انك نزلتي اه لسه عايزة اخس تاني كتير بس الي حد ما كده كويس علي الاقل بخس بصحتي
ومرت الايام وانهارده عيد ميلاد سيف .. كان لازم اعمله حاجة تفرحة .. اتفقت انا وداليا ومصطفي وفعلا زوقنا المكتب وجيبنا تورتايه كبيره وعملناله حفله عيد ميلاد صغيره اوي
فرح بيها اوي بالرغم من بساطتها الا ان معناها كان كبير وانا جيبتله هديه صغيره وقدمتهاله كان يوم حلو اوي علينا بجد وعليه
كانت الايام بتمر علينا وكانت تعاملتنا بتزيد .. في يوم كنت قاعده علي الكمبيوتر ولاقيت ايميل من الشركة الاجنبيه بترفض العرض بتاعنا مع انه كان افضل عرض متقدم ليهم وده اللي عرفناه من مندوب الشركة .. بس مش عارفه ليه العرض اترفض .. كنت حزينه اوي لان سيف كان بيحلم بالتوكيل بتاع الشركة دي لانها هتبقي السبب في تكبير الشركة بتاعته .. بس للاسف مالوش نصيب فيها .. دخلت بلغته لاقيته بقي حزين اوي
قولتله قدر الله وماشاء فعل اكيد ربنا عاينلك حاجة احسن
قالي ان شاء الله
سبته والحزن ماليه بس كنت كل شويه بتطمن عليه .. سيف الفتره دي بقي غريب اوي ودايما حزين حتي الضحكة مابقتش بتعرف لوشه مكان .. حاولت اقرب منه واعرف اللي مضايقه بس مكنش بيتكلم .. سيف بدأ يخسر كتير في شغله وكل ما يدخل في شغل لازم يخسره مبقتش عارفه هو ايه اللي بيحصل ولا مين اللي له يد في كده .. سيف مالوش اعداء .. ولا حد يعرف عنه حاجة حتي شركته مش كبيره ولا هو رجل اعمال معروف .. سيف بيشتغل بضمير وبيراعي ربنا .. سيف لو كان كده ولا كده كان زمانه بقي من اشهر رجال الاعمال في مجال الاستيراد والتصدير .. بس سيف لاء ميعملش كده لانه بيخاف اوي من ربنا
حاولت ادور واسأل مين اللي ليه مصلحة في خساره سيف .. بس للاسف مكنتش بلاقي اجابه واللي زاد كمان سيف بقي حساس اوي اليومين دول وبيتكلم عن ضحي كتير وبيحاول يكلمها بس للاسف مبترودش عليه
في يوم انا كنت قاعده في مكتبي ولاقيته بيزعق وصوته عالي اوي وبيتكلم بمنتهي العصبيه .. وبيقولها اخوكي عايش يا ضحي انا ممتش ومهما قولتي ان اخوكي مات بس اخوكي هيفضل عايش جمبك وحواليكي وقت ما تحتاجيه انتي فاهمه ولا لاء انا عايش يا ضحي انا عايش
دخلت عليه وانا قلقانه اوي من عصبيته وخاصه ان الدكتور مانع عنه اي انفعال
لاقيته منهار ومش قادر ياخد نفسه وعمال بيقول مش انا اللي مو…..تهم يا ضحي مش انا اللي مو…تهم
مكنتش فاهمه اي حاجة ولا فاهمه هو بيقول ايه ومو….ت مين سيف قاتل لاء مستحيل مستحيل يعمل حاجة زي كده مستحيل .. لاقيت وشه بيصفر وروحة بتتسحب منه ناديت علي حد يلحقني واتصلت بالاسعاف وداليا كلمت مصطفي .. الاسعاف جت نقلت سيف وانا وداليا روحنا معاه .. فضلنا واقفين بره وشويه ومصطفي جه
قالنا مصطفي ايه اللي حصل ماله سيف يا نادين
رديت عليه وانا ببكي ومحروقه في قلبي من كلام سيف اللي مش قادرة افسره ولا افهمه وكمان تعبه وقولتله مش عارفه مش عارفه يا استاذ مصطفي مش عارفه
قالي ايه اللي حصل احكيلي
حكتله كل اللي سمعته وقولتله انا مش فاهمه حاجة هو مو….ت مين
رد عليا بعصبيه وقالي سيف ممو…تش حد سيف ممو…تش حد
خرج الدكتور وجرينا كلنا عليه وقاله مصطفي في ايه يا دكتور ايه اللي حصل
رد الدكتور وقاله للاسف الاستاذ سيف اتعرض لارتفاع ضغط مفاجئ ادي لتصلب الشرايين ولازم حالا نعمل عمليه
رديت وقولت بقلق عمليه
الدكتور قال لازم نتدخل والا هتبقي اضراره كبيره جدا لانه اتعرض لضغط شديد
مصطفي قاله اعمل اللازم يا دكتور المهم ان سيف يقوم بالسلامة
كنت حاسه اني مش قادرة اقف ولا قادرة اتحرك ولا قادرة اتكلم كنت حاسه ان روحي راحت مني من القلق والخوف علي سيف كان هاين عليه اقوله روحي فداك يا سيف انا كلي فداك بس انت تقوم بالسلامة
مصطفي حاول يقومني بس للاسف مكنتش قادرة اقف علي رجلي ودموعي نازله منها كانها شلال من الدموع
كان نفسي اعمل اي حاجة علشان سيف وقررت اني اعمل معاه اللي محدش قدر يعمله بس يارب اقدر علي اسعاده واني ارجعله روحه من تاني يارب قدرني