سكرتيرة ولكن

الفصـــــــل التـــــــــآســــــــع

مر يومين وكنت بتعامل مع سيف بقوه ربنا كان مقوي قلبي و قربي منه خلاني قويه اكتر ومضعفش واجري ورا احاسيسي كان كل اللي بينا هو الشغل وبس ومكنتش بحاول اهتم بيه يمكن كتير كان قلبي بيوجعني بس ربنا كان معايا بسرعه بيداويهولي وبينهي الالم في ثواني .. كنت كل ما احس اني هضعف اجري علي اي اوضه واصلي وادعي ربنا يقويني او كنت امسك مصحفي واقرا فيه مش ربنا سبحانه وتعالي بيقول ” الا بذكر الله تطمئن القلوب ”
كنت قاعده قدام الكمبيوتر ولاقيت ايميل جاي من الشركة بيبلغنا بالمعاد اللي هيقابلونا فيه .. طبعت الايميل ودخلت بيه لاستاذ سيف .. بس اول ما دخلت لاقيته حزين ومهموم مش عارفه ليه اول ما شوفته حسيت بنغزه في قلبي كان نفسي اقوله مالك كان نفسي اشيل عنه همه واعوضه وحدته .. بس انا اتفقت مع ربنا ان قلبي مش هيدق غير في الحلال .. اه انا زي اي بنت نفسها تحب وتتحب بس دايما كنت بقول يارب ارزقني الحب الحلال اللي ميغضبكش مني ولا يشيلني ذنب ..بلغته بالمعاد وقالي ابعتيلهم رد باننا جاهزين للمقابله قولتله حاضر وفضلت واقفه فتره قالي فيه حاجة تانيه يا نادين
قولتله انا بس بفكرك بفرح سماح انه بكرة حضرتك هتروح
قالي ان شاء الله مينفعش ما اروحش سماح كانت معايا بقالها سنه
سيبته ومشيت بعد ما استأذنت وخلصت شغلي وروحت وقفت قدام الدولاب اختار حاجة البسها واروح بيها الفرح بس كنت كل ما اقيس حاجة تطلع ضيقه .. وزني زاد بشكل ملحوظ بس اظاهر ان انا مكنتش واخده بالي .. اهتميت بسيف واهملت نفسي .. كنت واقفه قدام المرايه مقدرتش ابين ملامحي بجد مش عارفه ايه اللي حصلي اه انا كنت مليانه بس بصراحة وزني زاد اكتر .. ناديت ع ماما وقولتلها مش عارفه البس ايه انا بفكر مروحش
لاقيت ماما بتقولي لاء شوفي اي حاجة حلوة من لبسك وروحي بيها خلي الناس تشوفك
اتضايقت جدا من كلام ماما بس هي دايما بتقولي كده بس بابا لما بيسمعها بيزعقلها ويقولها نصيبها هيجي لحد عندها .. بس انا مش زعلانه منها انا عارفه انها نفسها تفرح بيا وخاصه ان انا اللي باقيالها بعد اخواتي ما اتجوزوا ومابقاش غيري .. بس انا كمان مش مستعده اعرض نفسي لحد انا نفسي احب واتحب واتجوز اللي احبه مش مجرد جواز عادي .. اختارت طقم كويس وواسع وطويل ومر اليوم عادي وتاني يوم روحت الشركة وشوفت شغلي وبعد ما خلصت شغلي روحت ولبست وطلعت ع القاعه
مكنتش اعرف حد بس لمحت استاذ مصطفي وهو قاعد ع الترابيزة وكان معاه خالد ومعاهم داليا مسئوله المبيعات روحت قعدت معاهم وسلمت عليهم بس كانت عيني ع الباب كنت مستنياه بالرغم من اني لسه شايفاه الصبح بس مش عارفه ليه حسيت اني نفسي اشوفه اوي بره الشغل كان نفسي اتعرف عليه بعيد عن الشغل .. بس افتكرت وعدي مع ربنا استعذت بالله ورجعت لطبيعتي ومبقتش ببص ع الباب .. شويه ولاقيته جاي وبيسلم علينا وقعد معانا غصب عني اول ما شوفته ابتسمت وقالنا عقبالكم جميعا ان شاء الله
رد عليه مصطفي وقاله عقبال انت يا زعيم الاول انت اعملها واحنا وراك
قاله ايه يا عم انت شكلك بتحبني اوي انا مش مستعد اتجوز دلوقتي خالص
رد عليه خالد وقاله فعلا عندك حق الواحد الاول يعيش حياته وياخد من كل بستان زهره
رد عليه سيف وقاله ربنا يبعدنا عن الحرام انا ماليش في السكه دي بس لسه مالقتش اللي تستحق قلبي
رد عليه مصطفي وقاله فعلا يا سيف عندك حق اهم حاجة الحب ومتغلطش غلطتي
مكنتش فاهمه غلطه ايه اللي اعرفه ان استاذ مصطفي مش متجوز ولا حتي مرتبط
بس ردت داليا وقالت ليه يا استاذ مصطفي هو حضرتك متجوز
قالها كنت متجوز بس متفقناش وانفصلنا
لاقيت داليا وشها جاب الوان مش عارفه ليه وازاي هي متعرفش انا جيت الشركة لاقيتها موجوده بس يمكن متكونش تعرف مهتمتش
لاقيت سيف بيقولي عقبالك
قولتله ان شاء الله
لاقيت خالد دخل في الموضوع وقالي بخبث شويه طيب ما تقومي كده اتمشي في الفرح يمكن ربنا يفكها عليكي
حسيت بالخنقه من كلامه ولاقيت سيف بيبصله نظرة غضب وكان هيتكلم بس انا سبقت سيف وقولت لخالد
البضايع الرخيصه بس هي اللي بتعرض نفسها والغالي هو اللي الناس بتجري وراه وانا غاليه اوي اللي عايزني يجيلي لحد عندي ويتعب اوي علشان يوصلي
لاقيت نظره اعجاب من سيف ومصطفي
ولاقيت خالد بيقولي يتعب علي ايه يعني قومي يا بنتي قومي كلكم بتقولو كده وانتو مش لاقيين اساسا ونظرة ماليانه خبث قال يتمنعن وهن الراغبات
بجد كان اسلوبه مستفز وحاول يحرجني ويجرحني اكتر من مرة
استغفرت ربنا علشان متطاولش عليه قدامهم بس قولتله ده رزق ونصيب يا استاذ خالد نصيبي هيجيلي وانا حاطه رجل علي رجل وهتشرط كمان ولا انت متعرفش ان ربنا قال “رزقكم في السماء وما توعدون ”
لاقيت وشه احمر ومعرفش ينطق
قومت وقولتلهم بعد اذنكم مضطره امشي لان الوقت اتأخر
لاقيت سيف طلع ورايا وقالي استني هوصلك مش هينفع تروحي لوحدك في وقت زي ده
قولتله انا اسفه يا استاذ سيف انا مبركبش عربيات مع حد غريب
قالي يا بنتي انا مديرك في الشغل يعني مش غريب
قولتله انا اسفه حضرتك اجنبي عني ومينفعش اركب العربيه مع حضرتك بعد اذنك
وانا واقفه مستنيه تاكسي لاقيت مصطفي وخالد وداليا خارجين
ولاقيت مصطفي بيقول لسيف كويس اني لحقتك انت طلعت بسرعه ليه كده يلا خدني في طريقك
ولاقيت داليا بتقول لسيف وياريت بقي توصلني معاك يا استاذ سيف اما خالد لاقيته بيبصلي كده نظرات غريبه ومش مفهومه
لاقيت سيف قرب مني وبيقولي مش هتلاقي تاكسي واهو مصطفي وداليا كمان معانا انتي منشفه دماغك ليه
قولتله معلش يا استاذ سيف كل واحد حر في تصرفاته انما انا مش هركب معاكم بعد اذنك ووقفت تاكسي وركبت فيه وروحت
بجد كنت حاسه اني مخنوقه ومش طايقه نفسي روحت البيت ورميت نفسي ع السرير وقعدت اعيط
وكل ما افتكر كلام خالد ليا اعيط اكتر انا مش عارفه انا عملاله ايه ليه حاططني في دماغه ما داليا اهي قاعده ومحاولش حتي يضايقها ليه انا عايز مني ايه
كنت حاسه اني بجد تعبانه ومخنوقه ومش طايقه نفسي ولا طايقه حياتي ولا طايقه اروح الشركة وحمدت ربنا ان بكرة اجازه نمت وغطيت وشي وقعدت ادعي ربنا انه يرحمني من خالد ويبعده عني

الفصـــــــل العاشـــــــــــــــــر

انهارده الجمعه وبجد حمدت ربنا ان انهارده اجازة لاني بجد مكنتش متحمله اشوف اللي اسمه خالد ده ومكنتش طايقه لا اشوف حد ولا اكلم حد وفضلت قاعده طول اليوم علي الكمبيوتر بتاعي .. فتحت لقيت اسما صبحت عليها وسلمت عليها وبدأت اتكلم معاها واحكيلها علي كل اللي خانقني وتاعبني وبالذات خالد واسلوبه اللي دايما بيحاول يستفذني واتكلمت معاها علي سيف اللي تاعب قلبي وضميري اللي بيأنبني كل ما افكر فيه .. بس انا كنت دايما بدعي ربنا انه لو خير ليا ربنا يقربه مني ولو شر يبعده عني .. بس بجد كنت بتكلم مع اسما كاني بتكلم مع نفسي حتي موضوع وزني اللي زاد قولتهولها قالتلي انك لازم تخسي علشان ترجعي تاني عندك ثقه في نفسك لاني بجد ثقتي في نفسي انعدمت وخاصه بعد كلام خالد اللي يحرق الدم .. حاولت اسما تعيد ثقتي في نفسي تاني وشجعتني علي ريجيم اعمله واتفقنا واتفقت معاها ان خلاص كل حاجة هرميها ورا ضهري وهبدأ من جديد حتي لو خالد كلمني لازم اعلمه الادب واعرفه مقامه
فضلنا انا وهي نتكلم في الدنيا عامله ازاي وقعدت معاها لحد بالليل ولاقيت الموبيل بيرن ببص علي الموبيل استغربت لاقيته سيف
رديت عليه وقولتله ازيك يا استاذ سيف
لاقيت صوته مخنوق اوي وبيقولي الحمد لله انا بس حبيت اقولك اني في الشركة متنسيش تصحيني وانتي جايه
استغربت اكتر وقولت ايه اللي يخليه يبات في الشركة حتي يوم الاجازه بس فوقت من شرودي علي صوته وهو بيقولي معايا يا نادين
قولتله اه معاك يا استاذ سيف
قالي ماشي تصبحي علي خير
قولتله وحضرتك من اهله
لاقيت نفسي تلقائيا بفكر فيه بيعمل ايه في وحدته دي .. مالوش قرايب مالوش اخوات مالوش حد يسأل عليه .. حد يهتم بيه .. مين بيعمله اكله ومين بيغسله هدومه مش عارفه ليه حسيت بالحنين والحزن عليه بس كان لازم اوقف التفكير فيه بس ياريتني عرفت بالعكس التفكير فيه زاد وزاد اوي كمان .. انا حاسه ان سيف وراه سر وسر كبير اوي كان نفسي اقرب منه واعرف ايه السر ده بس للاسف مينفعش هو مديري ومينفعش اتخطي الحواجز اللي بينا .. وغير كده ربنا نهاني عن التعامل مع الرجال الا في اطار محدود مينفعش انا وهو ناخد وندي مع بعض .. مع اني كان نفسي اوي اشيل عنه همه واحاول اسعده بدأت افكر وافكر لحد ما غلبني النوم ونمت
تاني يوم الصبح قومت صليت ولبست ودعيت ربنا انه يبقي معايا دايما وروحت ع الشغل وانا في طريقي اتصلت بيه علشان اصحيه رد عليا وقالي انه صاحي
اشتريت فطار ليه وروحت ع الشركة خبطت وفتحلي هو
اول ما شوفته حسيت انه انسان تاني مش ده سيف اللي اعرفه ده واحد حزين اوي والهموم كسراه حسيت ان قلبي واجعني اوي عليه كان هاين عليا اطبطب عليه واقوله مالك مفيش حاجة تستاهل انك تضايق نفسك علشانها انت غالي اوي عليا يا سيف ومش هتحمل اشوفك بالمنظر ده ابدا بس للاسف مقدرتش اعمل حاجة غير اني ادعيله ربنا يفك كربه
دخلت المطبخ حضرتله الفطار ووديتهوله مكتبه بس قالي انه مالوش نفس قولتله علشان خاطري كل اي حاجة
حسيت ان عنيه وارمة اوي كانه كان بيبكي ولاقيت في ايده البوم صور عرفت انهم صور باباه ومامته غصب عني عيني دمعت واخدت منه الالبوم وقولتله ربنا يرحمهم
لاقيت عينه ماليانه بالدموع وقالي انا السبب
مفهمتش معني كلامه بس محاولتش اسأله وهو في الحاله دي
قولتله اهدي يا استاذ سيف مش كده
قالي سيبيني لوحدي يا نادين
خرجت وغصب عني عيني كانت مليانه بالدموع عليه بس دخلت المطبخ وعملتله عصير وخبطت وسمحلي بالدخول
حطيتله العصير وقولتله اشرب ده هيهديك
قالي مفيش حاجة هتهديني من اللي انا فيه
قولتله ان شاء الله ربنا يفك كربك
قالي يارب
قولتله قوم صلي ركعتين لله وهو هيبقي جمبك ومش هتبقي لوحدك
بصلي سيف اوي وقالي اكيد هعمل كده
سيبته وطلعت وقعدت علي مكتبي اشوف شغلي واتبعت ايميل ان المقابله هتكون بكرة في ” ……… ”
روحت علشان ابلغه خبطت بس مردش عليا دخلت لاقيته بيصلي وبيدعي ربنا ودموعه ماليه وشه حسيت ان قلبي موجوع اوي عليه كان نفسي اجري عليه واقوله علشان خاطري متعيطش اهون عليا امو…..ت ولا اني اشوف دموعك مهما كان السبب دمو….عك بتحر…قني بتمو؟؟؟تني بتقـ,ـتلني وانا واقفه عاجزة مش عارفه اعمل اي حاجة علشانك
لاقيت دموعي شاركت دموعه وكنت واقفه مبتحركش .. لاقيته بيبصلي وبيمسح دموعه وبيقولي في حاجة يا نادين مكنتش بتكلم مكنتش بعمل حاجة غير اني بعيط
قرب مني وقالي انتي بتعيطي ليه
قولتله من بين دموعي علشان انت كنت بتعيط
ابتسملي وقالي انا كنت بشكي حالي لربنا
قولتله وهو قادر علي كل شئ وهيسعدك
قالي يارب
قولتلهعلشان اخرجه من اللي هو فيه الشركة بعتت ايميل بالمعاد والمكان
قالي تمام واعملي حسابك هتيجي معايا
قولتله ليه
قالي علشان تدوني كل حاجة هتتقال وهيبقي معاكي العقود
قولتله حاضر
قالي روحي اغسلي وشك وشوفي شغلك يلا
قولتله حاضر
روحت كملت شغلي بس بجد كنت تعبانه اوي عليه بس كنت بدعيله كل شويه ان ربنا يسعده ويكرمه ويريح باله
شويه ولاقيت استاذ سيف بينادي عليا دخلتله قالي ابعتيلي خالد
كنت ما صدقت اني مش هتصادم مع خالد انهارده بس القدر مصمم اني اشوفه
روحت ناديت عليه وراح لسيف مكتبه
سيف كان صوته عالي مع خالد بس مسمعتش ولا كلمه كل اللي سمعته وهو بيقوله تحترم زمايلك انا مش مشغل معايا طفل
انا قولت ان حد اشتكاه بس مكنتش اعرف هو في ايه لاقيته خارج ووشه ده احمر دم ولاقيته بيقولي وعنيه ماليانه شرار مش انا اللي اتهزأ علشان واحدة زيك بكرة تدفعي تمن التهزيق ده
مكنتش فاهمه منه حاجة بس الخوف ملي قلبي ودخلت لاستاذ سيف وكنت بترعش وقولتله هو في ايه
قالي في ايه يا نادين
قولتله هو حضرتك هزأت استاذ خالد بسببي
قالي علشان بعد كده يحترم زمايله ويعرف يتكلم معاهم كويس
قولتله بس هو قالي وقطعت كلامي خوفت من خالد لاني افتكرت كلام سماح انه ممكن يشوه صورتي وسمعتي
لاقيت سيف بيقولي قالك ايه
قولتله ولا حاجة خلاص
قالي انا اسف يا نادين علي اسلوب خالد بس غصب عني خالد كفؤ في الشركة وبيشتغل حلو بس للاسف هو كده ربنا يهديه
قولتله يارب
طلعت تاني علي مكتبي وبدأت اشغل نفسي بشغلي وقريت قرءان علشان قلبي يهدي من الخوف كنت خايفه يعمل فيا حاجة
بس كان عندي يقين اني طول ما انا ماشيه صح وراضيه ربنا عمر ما حد يقدر يأذيني
نهيت شغلي وروحت بيتي تعبانه هلكانه بس غصب عني لاقيت نفسي بتصل باستاذ سيف اتطمن عليه
اتكلم معايا وطمني عليه وقالي كلمه عمري ما هنساها
انتي الوحيده اللي بتسأل عليا وبتخاف عليا ربنا يخليكي يا نادين
حسيت اني فرحانه بس كنت خايفه اوي من حاجات كتير اولها غضب ربنا عليا بس بجد تعبت ومبقتش قادرة استحمل انا بشر عندي احاسيس ومشاعر وقلبي مش ملكي ومش قادرة اسيطر علي نفسي اكتر من كده قلبي غصب عني راحله ومش راضي يرجعلي تاني
قومت اتوضيت وصليت ودعيت ربنا انه يكتبلي الخير ودعيت ان سيف يبقي من نصيبي
بس ياتري نصيبي ايه هو ده بس اللي ربنا عارفه