سكرتيرة ولكن
الفصــــل الخــآمــس عشـــــــر
الايام كانت بتمر وكلام مصطفي في دماغي انه بيمر بازمة نفسيه .. كنت بهتم بيه جدا وبحاول اعوضه عن وحدته .. بصراحة كنت بعوض نفسي انا كمان عن وحدتي وما صدقت لاقيت اللي يشاركني وحدتي واهو ناخد بونس بعض في الدنيا .. صحيح مكنش فيه حاجة بتجمعنا غير الشغل بس ع الاقل حاجة بتجمع بينا وخلاص .. اهتمامي بسيف زاد مش علشان كلام مصطفي لاء لان حبه في قلبي كان بيزيد .. كنت دايما ع اتصال بيه وكان نفسي اوي اني افهمه واقوله اني بحبه بس بطريقتي الخاصه .. كنت عايزة اسيبله اثر وذكري معايا .. حتي لو محصلش بينا نصيب بس كفايه انه دايما يفتكرني .. وهو ده اللي كنت عايزاه كنت عايزه دايما ابقي قريبه من سيف حتي لو القدر بعد بينا
كنت قاعده علي مكتبي زي كل يوم بشوف شغلي ولاقيت ايميل من الشركة الاجنبيه بتبلغنا بعمل اجتماع جماعي بين الشركات .. بس للاسف الاجتماع كان في اسكندريه وده لان الشركة هتبعت فوج من عندها علشان تقابل الشركات اللي مقدمه افضل العروض
طبعت الايميل ودخلت لسيف وقولتله علي اللي فيه
قالي بفرح بجد انتي وشك حلو اوي يا نادين والمعاد امتي
قولتله الفوج هيوصل بعد 3 ايام
قالي بسرعه يا نادين هاتيلي خالد وداليا علشان في اجتماع مهم وانتي معانا
فعلا ناديت علي خالد وداليا ودخلنا مكتب سيف وعقدنا الاجتماع وبدأ يفهمنا بالظبط اللي مطلوب مننا في السفريه دي
نهينا الاجتماع وطلب مني سيف فنجان قهوه .. دخلت عملتله فنجان القهوه وودتهوله المكتب وقالي اقعدي يا نادين
بعد ما قعدت قالي علي فكرة انتي معانا في السفريه دي
بصراحة كنت مبسوطة وفي نفس الوقت كنت مش عارفه هل بابا هيوافق ولا لاء
قولتله بس بصراحة انا مش عارفه بابا هيوافق ولا لاء
قالي نادين انتي واجهه الشركة ولازم تكوني معانا
بصراحة انا مكنتش واجهه خالص وكنت خايفه ان الموضوع ده يبوظ بسببي انا لبسي عادي واقل من العادي وكمان شكلي عادي وبجسمي ده مكنتش بعرف البس كويس الواجهه دي لالزم يبقي ليها مواصفات خاصه
.. بس خرجني من شرودي صوته وهو بيقولي لازم تقنعي باباكي بصراحة انا مبقتش بقدر استغني عنك
فرحت اوي بكلامة واترسم علي وشي ابتسامة صغيره وقولتله هحاول اقنعه ان شاء الله
قالي تمام اتصلي بقي بالفندق واحجزي اوضتين دبل
قولتله حاضر
فعلا اتصلت بالفندق وحجزت ونهيت شغلي وروحت لبابا واستأذنت منه .. في البدايه بابا مكنش موافق بس انا طبعا صممت وقولتله ان ده شغل .. بابا مش بيرفضلي طلب بس بيخاف عليا وفي نفس الوقت الحمد لله واثق فيا .. يمكن دي حاجة خليته يوافق وهي الثقه .. بس انا كنت خايفه اكون بخون الثقه دي وخاصه اني رايحة علشان سيف .. هو صحيح انا راحة علشان شغل بس هدفي الاول هو اني ابقي جمب سيف .. بس طبعا قولت لنفسي انه شغل علشان اريح ضميري
كانت الايام بتمر علينا وكان اهتمامي بسيف بيزيد وكلامه ليا وشكره ليا بيزيد .. سيف بقي انسان تاني مختلف مليان حيويه ونشاط تقريبا الحزن ده مكنش بيزورة .. يمكن يكون زي الحزن بيزورة بالليل لما يبقي لوحده وبعيد عن الناس .. بس كفايه اني بشوف البسمه مرسومة علي وشه دايما
يوم السفر الصبح اتقابلنا كلنا قدام الشركة .. ركب خالد جمب سيف وانا وداليا كنا ورا
قولتلهم نقول دعاء السفر قولته وهما رددوه ورايا .. سيف مكنش مشغل اي حاجة في العربيه
لاقيت خالد بيقول لسيف احنا هنقضي الطريق ده ناشف كده ما تشغلنا حاجة نسمعها
قاطعته وقولت لسيف شغلنا القرءان
سيف فعلا شغل القرءان
بعد شويه لاقيت خالد قفل القرءان وشغل اغاني
لاقيت سيف بيقوله في حد يقفل القرءان علشان يشغل اغاني
قاله ما انا صدقت وقفلته
قولتله بس احنا علي طريق سفر لا قدر الله لو حصلنا حاجة هنقابل ربنا واحنا بنسمع اغاني
قالي ايه ياست الشيخة خليكي في حالك
لاقيت داليا بتقولي خلينا نفرفش شويه ده الواحد ما صدق يخرج بره البلد الرخمة دي
لاقيت سيف بيقولها احنا جايين شغل مش جايين نتفسح ولازم تفهموا ده كويس
قالتله فاهمين
حسيت ان سيف تعبان جدا وده لانه الفتره اللي فاتت اجهد نفسه جامد في عروض الشركة في الشغل وكان لازم يطلع باقوي عرض في الشركات
بصراحة خوفت عليه وقولتله استاذ سيف ممكن نرتاح شويه بس
قالي ماشي يا نادين وقفنا عند استراحة ونزلنا قربت منه وقولتله انت كويس
قالي اه الحمد لله كويس
قولتله الدوا معاك
قالي بصراحة نسيته
فتحت شنطتي وطلعت منه الدوا بتاعه وقولتله وانا عامله حسابي اتفضل الدوا
لاقيته بيبصلي وبيبتسم وبيقولي مفيش حاجة تفوتك ابدا
قولتله بمرح عيب ده انا سكرتيره شاطرة اوي اعجبك يعني معندكش حد بقي عايز سكرتيره
قالي بزعل وهو انتي تقدري تسيبني اصلا علشان كنت قـ,ـتلتك
قولتله طيب اهون عليك
قالي بصراحة عمرك ما تهوني عليا اني افرط فيكي اللي يعرفك بجد يا نادين يعرف قيمتك الحقيقيه انتي كنز
حسيت بجد ان قلبي مش قادرة كنت حاسه ان قلبي هيقف من السعاده
حاولت اخفي التوتر اللي بان علي وشي والفرحة الغريبه اللي احتلت قلبي وهربت منه بنظراتي وطلعت السندوتشات اللي كنت عاملاها واديت لخالد وداليا واديت كمان لاستاذ سيف بس انا مكلتش بجد كنت شبعانه
علي فكرة انا عملت ريجيم وخسيت حبه صغيره بس محدش خد باله خالص من خسساني
لاقيت استاذ سيف بيقولي وانتي يا نادين مش هتاكلي
قولتله بصوت واطي لاء مش جعانه
قالي ليه بقي
قولتله بصراحة عامله ريجيم
قالي باستغراب ليه ريجيم
قولتله عادي بس عايزه اخس شويه
قالي ربنا يوفقك ويكون في عونك في موضوع الريجيم ده
قولتله يارب
خدنا طريقنا تاني لاسكندريه والحمد لله وصلنا الفندق .. طلعنا اوضنا انا وداليا كنا في اوضه وسيف وخالد كان في اوضه جمبنا علي طول
استاذ سيف قالنا ان انهارده مفيش شغل وان المقابله هتكون بكرة .. اول ما دخلنا الاوضه داليا غيرت هدومها بصراحة كانت هدومها بتاعه البيت ملفته اصلا مينفعش انها تقعد كده حتي لو قدام بنت زيها .. او يمكن هي متعوده علي كده .. بس انا حتي لبس البيت بتاعي دايما طويل ومقفول .. لاني كنت قاعده مع اخواتي الصبيان وليا اخ ساكن فوقي وبينزل عندنا كتير فمينفعش اقعد بحاجة مفتوحة او مكشوفه .. بصراحة بابا كان قافل علينا اوي بس بالرغم كده مدينا حريتنا وبيثق فينا .. بس هو اللي بيخاف علينا زياده عن اللزوم
انا اول ما وصلت اتصلت ببابا وطمنته عليا ولبست اسدالي وصليت الضهر .. وبعد شويه اتصلت باستاذ سيف واستأذنت منه انزل اتمشي شويه بس بصراحة رفض وقالي استني هننزل كلنا سوا بعد الغدا
فعلا استنيته بس فضلت لابسه الاسدال وقولت اخرج اتفرج ع البحر لان الفندق كان ع البحر علي طول .. لاقيت داليا واقفه ولابسه شورت وبدي نص كم وواقفه بشعرها عادي في البلكونه
قولتلها ايه ده يا داليا
ردت عليا بخضه وقالتلي ايه يا نادين في ايه
قولتلها ازاي تخرجي كده البلكونه افرضي حد شافك
قالتلي كبري دماغك يعني هو حد هيبص علي فوق اوي كده
قولتلها افرضي حد شافك من البلكونات اللي جمبك حرام
قالتلي ماشي ماشي
قولتلها براحتك انا عملت اللي عليا .. قعدت استغفر ربنا بصراحة مقدرتش اقف جمبها وهي بالمنظر ده .. بس سمعت صوت ضحكها مع حد في البلكونه قربت من البلكونه سمعت صوت خالد وهو بيقولها بس مكنتش اعرف انك مزه كده
بصراحة احتقرته واحتقرتها انها فرحانه اوي وهو بيقولها كده
وهي حتي مفكرتش تبين اي رد فعل فيه صد بالعكس كانت متساهله جدا معاه وقعدت تضحك
بصراحة اتضايقت جدا وناديت عليها وقولتلها
كده حرام يا داليا اللي انتي بتعمليه ده ازاي تسمحي ان خالد يتكلم معاكي بالطريقه دي وازاي تقفي قدامه بالمنظر ده ده محرم عليكي ازاي يشوف جسمك وازاي يقول الكلام ده وانتي تسكتيله
قالتلي زميلي وبيعبر عن اعجابه بيا
قولتلها عادي كده يعبر عن اعجابه بيكي انتي متعرفيش انك كده مصدر فتنه ليه انتي شيطانك بيلعب عليكي متخليهوش يهزمك
قالتلي نادين انا مش ناقصه مواعظ يعني اعمل ايه البس خيم زيك ومحدش يبصلي ومتجوزش
بصتلها باستغراب وقولتلها هو انتي بلبسك ده هتتجوزي
قالتلي اه طبعا كلهم بيهتموا بالمظهر ولازم البنت اللي هيتجوزوها تبقي مزه
قولتلها انتي عندك كام سنه
قالتلي عندي 27 سنه
قولتلها بس اللي انتي بتفكري بيه ده تفكير طفله مش تفكير انسانه ناضجة لان نصيبك هيجيلك ومش هيروح منك في حته .. ومهما عملتي في نفسك مش هتاخدي لا اكتر ولا اقل من نصيبك
قالتلي بانكسار يعني اعمل ايه انا سني بقي 27 سنه ولسه لحد دلوقتي متخطبتش واصحابي كلهم اتجوزوا ولازم اعمل حاجة علشان اتجوز حتي اللي بحبه طلع كان متجوز واصلا مش مديني وش ولا مهتم بيا
قولتلها انتي بتحبي مين
قالتلي مصطفي بحب استاذ مصطفي
قولتلها وانتي فاكرة انه بكده هيحبك ويتعلق بيكي لازم يحب روحك مش بيحب شكلك ولا مظهرك لازم يحبك من جواكي يلمسك من جواكي
قالتلي يعني اعمل ايه يا نادين
قولتلها لازم تتغيري لازم تخليه يشوفك من جوه مش من بره مصطفي طلق مراته لانه مكنش متفاهم معاها لازم يحس انك قريبه منه بتهتمي بيه وبتسالي عليه .. تفكيركم واحد بس انتي واستاذ مصطفي الشئ ونقيضه مينفعش باسلوبك ده
قالتلي يعني انتي شايفه كده
قولتلها انتي هتقبلي تتغيري علشان مصطفي ليه متتغيريش علشان ربنا وتقربي من ربنا وهو هيقربك من مصطفي
قالتلي نادين ممكن تساعديني اقرب من ربنا واقرب من مصطفي
قولتلها حاضر
بجد كنت فرحانه اوي اني كنت السبب في تغيير داليا كمان وسبب التزامها .. فعلا ربنا مسبب الاسباب .. كنت بتمني كمان اغير من خالد واخليه يقرب من ربنا .. بس بجد كنت بخاف منه مش عارفه ليه
الحمد لله اخدت بايد داليا وخليتها تقرب من ربنا.. يمكن لسه المشوار طويل علي الالتزام بس ع الاقل بدأنا فيه
بعد شويه استاذ سيف كلمنا وقالنا ع الغدا نزلنا اتغدينا .. وبعد كده طلعنا اتمشينا شويه ع الكورنيش .. كنت ماشيه مع داليا وكنا بنتكلم عن افضال ربنا علينا والنعم اللي ماليه حياتنا واحنا مش واخدين بالنا منها .. كانت داليا كل ما تضحك ضحكة عاليه انبهها واقولها مينفعش كانت تستغفر ربنا .. كنت بكلمها بهدوء علشان تستجيب ليا وتحكيلي ولازم ترتاح لي
خلصنا جولتنا واستاذ سيف طلب مننا اننا نروح ننام علشان نصحي بدري نشوف شغلنا
كل واحد طلع اوضته ونمنا
الفصـــل الســآدس عشـــــــر
قومت من النوم قبل الفجر بشويه صليت القيام وقعدت اقرا قرءان لحد صلاه الفجر .. صحيت داليا من النوم وقولتلها يلا قومي صلي الفجر .. في الاول كانت كسلانه قولتلها يلا يا داليا علشان ربنا يرضي عليكي .. قامت داليا من النوم ودخلت اتوضت وصلت معايا .. قعدت انا وهي نقرأ اذكار الصباح .. داليا دخلت نامت وانا مسكت المصحف وطلعت البلكونه اقرا شويه .. وانا قاعده لاقيت سيف في البلكونه اللي جمبي وبيقولي صباح الخير
رديت عليه بابتسامة وقولت صباح النور
ايه اللي مصحيكي بدري كده
قولتله قومت اصلي الفجر وقولت اقرا شويه قرءان
قالي بارك الله فيكي نادرا لما تلاقي بنت ملتزمة زيك
قولتله الواحد بيجتهد بس ربنا يتقبل
قالي ان شاء الله يتقبل
قولتله وانت ايه اللي مصحيك بدري كده
قالي بصراحة قلقت قومت صليت الفجر وقعدت افكر في المقابله بتاعه انهارده
قولتله متقلقش ان شاء الله خير ده رزق ونصيب وربنا سبحانه وتعالي قال لكل مجتهد نصيب
قالي دعواتك
قولتله ربنا يكرمك يارب انت تستاهل كل خير
قالي طب يلا ادخلي البسي وننزل نفطر عقبال ما القـ,ـتلا دول يصحو من النوم
قولتله حاضر
دخلت لبست وفتحت الباب لاقيت سيف واقف مستنيني ع الباب
نزلت انا وهو وفطرنا .. وقالي لسه بدري اوي علي المعاد تحبي تطلعي ترتاحي
قولتله لاء هروح اتمشي شويه ع البحر
قالي طيب ممكن اجي معاكي
قولتله اه طبعا
كنت ماشيه جمبه وحاسه اني طايره من الفرح معقول انا ماشيه جمب سيف .. كنت حاسه باحاسيس غريبه مضطربه .. كان احساس بالرضا واحساس بالخوف .. مش عارفه اللي انا بعمله ده صح ولا غلط .. انا عارفه انه حرام بس قلبي كان مسيطر عليا بشكل غريب .. ومصورلي اني اللي بعمله عادي مادام فيه بينا حدود .. انا وسيف متكلمناش وكنا ماشيين مع بعض بس كل واحد سرحان في حاجة .. كان نفسي ادخل جواه واعرف هو سرحان في ايه
بس قطع شرودي صوته وهو بيقولي تعرفي يا نادين احنا بقالنا اد ايه شغالين مع بعض ومعرفش عنك اي حاجة
قولتله حضرتك عايز تعرف ايه عني
قالي مش عارف بس انا معرفش عنك حاجة خالص
قولتله انا اسمي نادين عندي 24 سنه انا اصغر اخواتي عندي اخين و اخت كلهم متجوزين اخويا الكبير مهندس وبيشتغل في البحر الاحمر ونادرا لما بيجي اجازات واخويا الاصغر منه بيشتغل محاسب في بنك واختي متجوزة ومش بتشتغل ووالدي كان وكيل وزاره بس ع المعاش ووالدتي ست بيت
قالي بسم الله ماشاء الله ربنا يبارك لوالدك فيكم وربنا يخليكم لبعض
قولتله يارب
لاقيته سرح تاني بس اترسم علي وشه الحزن
قولتله مالك يا استاذ سيف
لاقيته بيقولي ضحي وحشتني اوي يا نادين
قولتله بحزن انتو مالكوش الا بعض واكيد انت كمان واحشها انا بس مش عارفه انت عملت ايه علشان هي تبعد اوي كده عنك
قالي كل الناس ظلموني وانا اللي شايل الهم لوحدي ومحدش حاسس بيا
قولتله طيب احكيلي يمكن اقدر اساعدك
قالي انا بجد مش بحب افتكر اللي حصل ومش عايز افتكره
قولتله خلاص يا استاذ سيف ارمي همك علي ربنا واكيد هو اللي هيبين الحق واختك مالهاش غيرك بس تلاقيها زعلانه بس اكيد هتعرف انها غلطت في حقك وهتسامحك
قالي يارب يا نادين
قولتله ان شاء الله
قالي طب يلا نرجع يادوب نجهز ونشوف خالد وداليا علشان نروح الاجتماع في معادنا
روحنا الفندق لاقينا خالد وداليا قاعدين تحت في الريسيبشن
بس لاقيت خالد بيبصلي بصه غريبه اوي مفهمتش معناها
قال سيف يلا يا جماعه اجهزوا علشان يادوب نروح المعاد
طلعنا كلنا جهزنا وروحنا المعاد واجتمعنا كلنا كانت كل شركة بتقابل الفوج لوحدها وبتقدم عروضها
فعلا جه علينا الدور ودخلنا القاعه وبدأنا نقدم العرض وكل واحد كان عارف دورة كويس اوي وقام بيه ع اكمل وجه
وبعد ما نهينا الشغل لاقينا سيف بيبصلنا كلنا بفخر وبيقولنا احسنتو
قولتله ربنا يقدم اللي فيه الخير
رجعنا تاني الفندق واتغدينا واحنا ع الغدا استاذ سيف قالنا احنا كده خلصنا يلا جهزوا حاجتكم علشان نسافر انهارده
داليا قالتله بليز يا مستر سيف خلينا انهارده نتفسح شويه
سيف قالنا ايه رئيكم
قولتله اللي حضرتك تشوفه يا استاذ سيف
قال وانت يا خالد
رد خالد وقاله نقعد طبعا انهارده بس السهره صباحي بقي انهارده الخميس وبكرة اجازة ونسافر بكرة بالليل
سيف قاله ماشي يا سي خالد بصراحة انا كمان محتاج اغير جو
بصراحة كلنا فرحنا بس انا فرحت اكتر لاني هقعد مع سيف كمان يومين
بعد الغدا طلعنا ارتاحنا شويه ونزلنا تاني روحنا قعدنا في كافيه وقعدنا نضحك ونهزر بس كان دايما خالد ليه نظرات ليا كنت مستغرباها وخايفه كمان منها .. كنت لما بشوفه بيبصلي كنت بحط وشي في الارض مكنتش بقدر ابص عليه
خلصنا ومشينا رجعنا الفندق وطلعنا الاوض بس بصراحة كنت حاسه اني مخنوقه قولت لداليا اني هنزل اتمشي شويه
نزلت اتمشي شويه ع الكورنيش ووقفت قدام البحر
لاقيت واحد بيمسكني من دراعي وبيقولي ماشيه لوحدك ليه
ببص وانا بشيل ايده من دراعي لاقيته خالد
قولتله بعصبيه انت ازاي تسمح لنفسك تمسكني كده
قالي انتي هتعملي عليا انا خضرة الشريفه ما انا شايفك وانتي ماشيه مع سيف ولا هو سيف حلو وانا كخة
قولتله احترم نفسك انت ازاي تتكلم معايا كده
قالي انتي فاكرة نفسك حاجة يا بنتي انا بعمل فيكي جميل لان محدش هيعبرك انتي مش شايفه نفسك عامله ازاي ولا معندكوش مرايات انتي اصلا محدش ممكن يبصلك ولا يعبرك انتي تحمدي ربنا اصلا اني فكرت ابصلك بس انتو كلكم عينه واحدة بترسمو الاحترام وانتو اصلا متعرفوش معني الاحترام
محستش بنفسي غير وبايدي علي وشه وبجري
سمعته وهو بيقولي هتدفعي تمن القلم ده غالي اوي يا نادين
جريت وانا مش شايفه قدامي من الدموع دلوقتي بس فهمت كلامه ليا طول المده دي ونظراته اللي مش مفهومة .. كنت حاسه ان روحي بتروح مني وكنت بترعش ومش قادرة حتي اتحرك ما صدقت وصلت الفندق وجريت ع الاوضه وخبط علي داليا وفجأه محستش بنفسي