سكرتيرة ولكن

الفصـــل الآول

صحيت من النوم زي ما بصحي كل يوم علي صوت ماما العالي وهي بتزعق وتقولي قومي يا بنتي كفايه نوم كده الضهر هيأذن انتي تفضلي صاحيه طول الليل قدام الزفت ده وتنامي طول النهار
قومت من النوم وقعدت افرك في عيني وانفخ واقول يا فتاح يا عليم هو كل يوم الموال ده احنا مش هنخلص
قومت من ع السرير بالعافيه وطلعت من الاوضه لاقيت ماما واقفه في المطبخ صبحت عليها ودخلت اتوضيت وصليت الضهر لانه كان أذن فعلا ودخلت لماما المطبخ علشان اسمع اصطباحة كل يوم
الام : يابنتي حرام عليكي نفسك وصحتك وقعدتك اللي مالهاش لازمة طول الليل قاعده قدام النت انتي مبتزهقيش مبتشوفيش شكلك بقي عامل ازاي وتخنتي ازاي من القاعده
رديت عليها وقولتلها طب قوليلي اعمل ايه بقالي 3 سنين متخرجة كورسات وخدت شغل وقدمت انا تعبت من كتر التقديم في وظايف ومحدش معبرني ولا حتي حد فكر يقولي تعالي انتي اتقبلتي
ردت عليا ماما بمواعظها الجميله يابنتي لازم تخرجي انتي هتفضلي قاعدالي كده لا حد بيشوفك ولا بتشوفي حد انزلي دوري ع شغل يمكن حد يشوفك ويتقدملك
بصتلها باستغراب وقولتلها انتي بتقولي ايه يا ماما امشي في الشارع اقول عريس يا محسنين ليه هو انا للدرجة دي عنست
قالتلي عنستي ايه يا بت انتي بس اللي قدك فاتحين بيوت ما اصحابك كلهم اتجوزوا وانتي اللي قاعدالي كده زي البيت الوقف
بصتلها بصدمة كبيرة وقولتلها بيت وقف بصراحة الكلام معاكي يا ست الكل يفتح النفس ع الحياه انا اروح اقعد قدام المخروب احسن
فتحت الكمبيوتر وفتحت النت صديقي الوفي من ساعه ما اتخرجت ومابقاش ليا اي اصحاب طبعا الدنيا بعدت كل الناس عن بعض ومابقاش ليا اي صحاب وماليش غير واحدة بس اللي قريبه مني وهي صحبتي من ع النت
دخلت النت وفتحت الفيس بوك واول حاجة عملتها لما دخلت فتحت شات مع اسما اقرب صديقه ليا واكتر واحدة بتسمعني وبتفهمني بعد ما صبحت عليها واطمنا علي بعض لاقيتها بتقولي مالك مش مظبوطة
قولتلها يعني هو في ايه في الدنيا مظبوط ما انا عامله زي البيت الوقف
قالتلي ايه الكلام اللي انتي بتقوليه ده
لقيت دموعي بتنزل مني غصب عني وقولتلها حاسه اني تعبت من كل حاجة وحاسه ان كل الابواب مقفله في وشي كل ما اقدم في شغل محدش يعبرني انا عارفه ان اكيد ربنا عاينلي حاجة كويسه بس انا بجد تعبت ونفسيتي مبقتش قادرة استحمل مافيش في حياتي اي جديد مبعملش اي حاجة غير اني بنام وباكل وبقعد ع النت اكتر من كده مبعملش دورت كتير علي شغل بس كل الابواب مسدودة انا مش عارفه انا عملت ايه في دنيتي علشان اتعاقب اوي كده
لاقيتها بترود عليا بطيبتها المعتاده وبتقولي اوعي تيأسي ولا تقنطوا من رحمة الله اكيد ربنا عايزلك الخير ولسه نصيبك ماجاش وكل حاجة بتيجي في وقتها
قولتلها ونعم بالله بس انا فعلا تعبت ومبقتش قادرة دايما لوحدي وحاسه اني مخنوقه انا كرهت البيت والقاعده فيه وكرهت البلد كلها ظروفها مش سامحة باي حاجة خالص لا شغل ولا جواز انا حاسه بجد ان فيا عيب اذا كانت امي نفسها بتقولي انك عامله زي البيت الوقف الناس بره بتقول عليا ايه
ردت عليا وقالتلي حرام عليكي انتي لسه 24 سنه امال اللي عندهم 30 يقولوا ايه يابنتي انتي لسه صغيره عيشي سنك وحياتك مستعجله ليه ع المسئوليه
قولتلها انا مش مستعجله بس انا نفسي حاجة تغير مجري حياتي لاني بجد تعبت منها وانتي عارفغه اني مش بفكر في الجواز بس ع الاقل اثبت ذاتي ونفسي المجتمع قافل علينا وكاننا مش موجودين شهادتي واخداها من 3 سنين ورامياها ماستفدتش بيها باي حاجة وبجد تعبت ومبقتش قادرة استحمل
قالتلي استهدي بالله وان شاء الله ربنا يكرمك وتشوفي كل حاجة كويسه
قولتلها يارب يا اسما لاني بجد تعبت
بدأت انا واسما نتكلم سوا وحاولت تخرجني من اللي انا فيه وفعلا عرفت بدمها الخفيف ومرحها انها تخرجني من الجو ده
مكنتش بعمل اي حاجة غير اني اتكلم معاها وكنت بقضي النت مابين الفيس والتنقل بين المواقع اي حاجة تضيع الوقت وبس كتير كنت بحس بالملل منه بس ماليش حاجة تانيه اعملها غيره
وكانت حياتي بتمر بشكل روتيني جدا وكنت مستنيه معجزة من ربنا سبحانه وتعالي تغيرلي حياتي
بس ياتري المعجزة هتحصل ولا هفضل زي ما انا محلك سر

الفصـــل الثــآنــــي

كانت الايام بتمر عليا بطيئه وممله وكلها شبه بعض وطبعا اليوم ما بيخلاش من كلام ماما انتي مبتعمليش حاجة وانتي قاعده علي النت علي طول وكل ده نوم كنت بحاول استحمل علي قد ما اقدر بس اول ما احس اني خلاص مش قادرة اجري ع اسما واحكيلها تهديني وترجعني تاني لطبيعتي كانت بتعرف ببساطة تمحي اي حزن جوايا وتبدله لسعاده
وفي يوم كنت واقفه مع ماما في المطبخ ولاقيت الموبيل بيرن استغربت انا تليفوني في العادي مبيرنش نهائي روحت جبته ولاقيت رقم غريب هو اللي بيرن قررت مردش قولت اكيد معاكسه يعني هو مين اللي هيتصل بيا بس لاقيته بيتصل باصرار غريب وقررت ارد
اول ما فتحت الخط سمعت صوت رجولي هادي وفيه رزانه وبيقولي
انسه نادين
استغربت في الاول وقولتله ايوه انا نادين تحت امرك
رد عليا وقالي حضرتك كنتي مقدمه في شركة ” …….. ” من فتره
حاولت افتكر من كميه التقديمات اللي كنت بقدمها كنت مشوشه مش عارفه يقصد اي شركة بالظبط حاولت اتذكر بس للاسف معرفتش قولتله انا اسفه مش متذكرة بالظبط لو حضرتك تقولي العنوان
قالي طيب احنا منتظرينك بكرة ان شاء الله الساعه 10 صباحا في مقر الشركة واداني العنوان
كنت حاسه اني طايرة من الفرحة اخيرا الحظ ابتسملي اول حاجة عملتها جريت ع الكمبيوتر فتحته وبلغت اسما فعلا زي ما كنت متوقعه دعيتلي ان ربنا يكرمني ويوفقني وفرحتلي اوي
بالرغم من انها اصغر مني في السن بس دايما بحس بكبر عقلها واحتوائها ليا كانها اختي او امي .. وبالرغم من تعرفنا ع النت بس بجد كنا اقرب من اي اتنين يعرفوا بعض ومعاشرين بعض من سنين
مر اليوم عادي جدا عليا وكانت مشاعري مختلطه بين الفرح والخوف والتوتر
تاني يوم الصبح لاقيت اسما بتكلمني وبتديني الدفعه القويه علشان اثبت نفسي واكون واثقه من نفسي وانا بعمل المقابله صحيح انا مكنتش عارفه ايه هي الوظيفه بس كنت راضيه بيها اي حاجة تخرجني من عزلتي عن العالم
اخدت الجرعه من اسما ولبست هدومي ونزلت روحت العنوان وانا بدعي ان ربنا يوفقني .. ولما وصلت وقفت قدام العماره ابص ع اللوحات علشان اعرف الشركة الدور الكام وانا واقفه وببص لفوق وكنت مركزة في اللوحات وعماله ادعي ربنا يزيل التوتر اللي انا فيه ده وفجأه عربيه خبطتني وهي راجعه بضهرها
وقعت ع الارض وصرخت جامد وكانت ناس قليله ماشيه في الشارع .. اللي كان سايق العربيه نزل يشوف في ايه لانه مشافنيش وانا واقفه
راجل كبير قاله مش تحاسب يا ابني مش تبص وراك وانت بتركن كده تخبط البنت
بصيت علي صاحب العربيه كان شاب في اوائل التلاتينات او ممكن يكون في اواخر العشرينات بس كان ليه هيبه غريبه اول ما شوفته حسيت بالرهبه منه بس مش خوف وقاره كان غريب اعتذرلي جامد وصمم انه يوديني مستشفي وبالرغم اني فعلا مكنتش قادره امشي بس رفضت بشده وقولتله بصوت واهن لاء شكرا انا كويسه قومت من مكاني بمساعده الناس وهو فضل واقف لحد ما دخلت العماره ركبت الاسانسير بس طلعت دور غير الدور ونزلت من الاسانسير وقعدت ع السلم ارتاح لاني فعلا مكنتش قادرة اقف حاولت اظبط نفسي تاني وامسح دموعي اللي غرقت وشي بس مكنتش قادرة من الوجع والالم اللي في رجلي اعمل اي حاجة قعدت شويه وركبت الاسانسير تاني ونزلت الدور اللي كان فيه الشركة بس كان شكلي متبهدل خالص والتراب مالي هدومي كنت مكسوفه اوي ومكنش ينفع ارجع البيت تاني وقولت زي ما تيجي تيجي اللي ربنا كاتبه هو اللي هيكون
دخلت الشركة وروحت مكتب السكرتاريه وقولتلها اني معايا معاد كانت بتبصلي نظرات غريبه طبعا علي شكلي المبهدل بس اعمل ايه ده نصيبي ولازم اشوفه
سابتني السكرتيره بعد ما اخدت اسمي ودخلت مكتب وقفلت وراها الباب بعد شويه خرجت وقالتلي اتفضلي
دخلت المكتب وسبت الباب مفتوح السكرتيره جت تقفله قولتلها بصوت واطي لو سمحتي خليه مفتوح علشان مينفعش بصتلي باستغراب كانها بتقول ايه المجنونه دي فعلا سابته مفتوح وانا دخلت المكتب مدير الشركة كان مديني ضهره بالكرسي وكان بيتكلم في التليفون فضلت واقفه شويه وهو كل ده بيتكلم في التليفون اتنحنحت انتبه ليا ونهي المكالمه ورجع بالكرسي لوضعه الطبيعي وكانت الصدمة بالنسبه ليا ان هو نفسه اللي خبطني تحت اول ما شافني وقف وقالي معقول حضرتك انسه نادين
رديت عليه وقولتله ايوه
قالي انا بجد بعتذر عن الخبطة اللي خبطهالك اتفضلي اقعدي واقفه ليه
قعدت شويه وحاولت اتمالك اعصابي بصراحة مكنتش مصدقه نفسي
لاقيته بيقولي تشربي ايه اجيبلك عصير زمان اعصابك بايظة
بصراحة كانت اعصابي بايظة جدا مش من الخبطة لاء من الصدمة ان هونفس الشخص اللي رهبني بوقاره هو هيبقي مديري في الشغل طب ازاي هقدر اتعامل معاه
بس خرجني من شرودي وهو بيقولي رجلك عامله ايه دلوقتي لو تعبانه ممكن نروح مستشفي
رديت عليه وقولتله لاء الحمد لله كويسه
رجع تاني قعد علي مكتبه بعد ما طلبلي عصير وقالي انا سيف المنشاوي صاحب الشركة
قولتله بخجل اهلا وسهلا يا فندم
قالي انتي كنتي قدمتي من فتره عندنا انك تشتغلي في السكرتاريه
قولتله انا مش متذكرة بالظبط الوظيفه بس اللي فاكراه اني جيت فعلا الشركة هنا قبل كده بس مقبلتش حضرتك
قالي فعلا .. سكت شويه وقالي انتي ارتبطي باي شغل
قولتله لاء انا متفرغه
ابتسم شويه وقالي تمام تحبي تشتغلي معانا
بصيتله باستغراب وقولتله اكيد بس اشتغل من غير انترفيو
قالي اه هتشتغلي من غير انترفيو
قطع كلامنا دخول السكرتيره وهي بتحط العصير وهي خارجة قالها اقفلي الباب وراكي يا سماح لو سمحتي
رديت بسرعه وقولتله لا معلش خليه مفتوح علشان حرام
بصلي اوي باستغراب وقالي حرام
قولتله ايوه حرام لانها تعتبر خلوه
لاقيته مش مستوعب الكلام اللي بقوله بس شكله خدني علي اد عقلي لانه نهي الكلام وقال نرجع لموضوعنا كنا بنقول ايه
قولتله ازاي حضرتك هتعيني من غير انترفيو ي مش حضرتك تشوف مهاراتي الاول
قالي انا اختارتك من وسط 10 علشان مهاراتك انا محتاج سكرتاريه تكون عندها المام بلغات وكمبيوتر وانتي فيكي المهارات دي من خلال الابليكيشن اللي قدمتيه ولا انا غلط
قولتله صح
قالي انتي متخرجة من كليه لغات وترجمة ايطالي صح
قولتله صح
قالي ومعاكي لغات ايه غير الايطالي
قولتله معايا انجليش وفرينش واسباني
قالي تمام اوي وانا متفائل بيكي يا انسه نادين تحبي تبدأي الشغل من امتي
قولتله علي طول كده
قالي انا انسان بحب شغلي جدا ومبحبش اضيع وقت تحبي تشتغلي من بكرة
فرحت جدا وقولتله اه احب
قالي ان شاء الله هننتظرك بكرة احنا مواعيدنا من 10 صباحا ل 6 مساءا
شكرته واستأذنت
رجعت البيت وانا فرحانه جدا نسيت الم رجلي ونسيت الخبطة ونسيت كل حاجة مكنتش فاكرة غير اني خلاص ودعت الملل والروتين وهلاقي حاجة في حياتي تشغل وقتي
طبعا روحت حكيت لماما وخدت منها دعوتين حلوين وجريت علي الكمبيوتر فتحته وحكيت لاسما كل اللي حصل دعتلي وشجعتني اني اثبت نفسي علي اد ما اقدر في الشغل ده فضلت صاحيه اصلي وادعي ربنا انه يوفقني ويبقي جمبي
ونمت وانا عندي امل ويقين اني علي اول السلم لتحقيق الحلم