سكرتيرة ولكن
الفصــل الســـآبــــع
تاني يوم الصبح قومت من النوم بكسل فظيع انا اصلا منمتش طول الليل من كتر التفكير كنت قايمة مصدعه ومش شايفه قدامي من كتر العياط والتفكير وكنت بفكر اني مروحش الشركة انهارده بس حاجة جوايا قالتلي قومي روحي علشان تشوفيه مش عارفه ليه مع اني كنت مقرره ان خلاص مش هفكر بقلبي تاني بس هو احساس جوايا قالي قومي روحي شغلك .. جيت علي نفسي وقومت اتوضيت وصليت ولبست ونزلت .. كنت طول الطريق حاسه اني قلقانه ومش مطمنه مش عارفه ليه بس كنت بستعيذ بالله وكان دايما ذكر الله علي لساني علشان الهي نفسي عن التفكير في سيف وكمان مش عايزه حاجة تخليني اتعلق بيه قعدت ادعي ان ربنا ينصر قلبي ويحفظهولي لحد ما وصلت الشركة فتحت الباب وروحت علي مكتب سيف علشان اروقه صحيح انا قررت اني احفظ قلبي بس خلاص بقي ادمان اني اهتم بكل التفاصيل اللي تخصه واهتمامي بيه بقي جزء من حياتي
دخلت المكتب لاقيته نايم وسمعت منه همهمات بسيطة في البدايه استغربت لانه مقاليش انه هيبات في الشركة و قربت منه حاولت اسمع هو بيقول ايه حاولت اصحيه مكنش بيصحي بس كان وشه ماليان عرق ومكنش قادر ياخد نفسه جسيت وشه لاقيت حرارته عاليه والهمهمات بتزيد حاولت اسمع واستوعب مقدرتش افهم منه هو بيقول ايه اول ما شوفته كده حسيت بفزع وخوف عليه حسيت ان قلبي واجعني اوي عليه ونسيت كل حاجة هو عملها ومفتكرتش بس غير حبي ليه حتي القرار اللي اخدته نسيته وكنت ملهوفه اوي علي سيف ..مكنتش عارفه اتصرف ازاي او اعمل ايه بس كانت دموعي ماليه عيني كنت حاسه اني همو….ت من الخوف عليه بس للحظة قدرت الملم افكاري وقدرت اتصرف مسكت تليفونه واتصلت باستاذ مصطفي
استاذ مصطفي هو مدير الحسابات واقرب صديق لسيف
اتصلت بيه ورد عليا كنت بكلمه وبحاول امسك نفسي علشان معيطش لاقيته بيقولي ايوه يا سيف
قولت بصوت متقطع انا نادين يا استاذ مصطفي
استغرب وقالي خير يا نادين في ايه
لحد هنا ومقدرتش استوعب ولاقيت نفسي بعيط جامد اوي وبقوله استاذ سيف تعبان اوي وسخن ومش قادر ياخد نفسه هات دكتور بسرعه
قالي طيب يا نادين انا جاي في السكه
فتحت التلاجة وجبت منها ميه ساقعه وجبت فوطة وقعدت جمبه وبدأت اعمله كمدات علشان الحرارة تنزل شويه .. كل ده وانا دموعي نازله مني مش قادرة اوقفها وعماله اقرا قرءان عليه علشان يرتاح
بدأ يتكلم بصوت شبه مفهوم بس ضعيف اوي حاولت اقرب منه واسمع هو بيقول ايه
لاقيته بيقول ليه كده مش انا السبب مش انا السبب محتاجك يا ضحي متسيبنيش متسيبنيش يا ضحي انا بمو….ت
غصب عني لاقيت دموعي نازله مني ومش قادرة امسكها وقعدت اسأل نفسي مين ضحي مين دي اللي مش عايزها تسيبه قعدت افتكر المكالمه اللي بينهم وكلامه ليها وهو تعبان كنت حاسه ان دماغي هتنفجر ليه كده ياتري حبيبته طيب يمكن خطيبته معقول بيحبها كل الحب ده وتعب علشان كلمته وحش طب ليه اعرف بعد ما حبيته اه حبيتك يا سيف حبيتك وخلفت عهدي علشانك وسلمتلك قلبي غصب عني معقول هتجرحني هتجرحني يا سيف
فوقت من شرودي علي دخول استاذ مصطفي ومعاه الدكتور وكان استاذ مصطفي بيقولي ايه اللي حصل يا نادين
قولتله انا جيت وبفتح المكتب لاقيته كده تعبان كلمتك علي طول وقعدت عملتله كمدات
قالي استاذ مصطفي طيب يا نادين تعالي نطلع ونسيب الدكتور يشوف شغله
طلعت انا ومصطفي بره وكان القلق والتوتر باين اوي علي وشي
اول كلمه نطقت بيها من ساعه ما خرجت الدكتور اتأخر اوي
لاقيت مصطفي بيبصلي باستغراب وبيقولي لا متأخرش ولا حاجة انا هدخل اشوفه
شويه ولاقيتهم خارجين لاقيت نفسي بجري ع الدكتور وبساله عامل ايه
رد عليا الدكتور وقال هو كويس بس درجة حرارته كانت عاليه اديتله حقنه والدوا ده يجي وياريت ياكل مسلوق
استاذ مصطفي وصل الدكتور ورجعلي وقال انا هنزل اجيب الدوا بس هو فيه مشكله
قولتله باستغراب ايه هي
قالي مين اللي هيعمله الاكل
بصتله بعدم فهم وقولتله هو معندهوش حد
بصلي مصطفي باسف وقالي للاسف سيف عايش لوحدة بعد وفاه باباه ومامته
اتصدمت انا اول مرة اعرف ان والده ووالدته متوفين قولتله باسف ومين اللي هياخد باله منه في تعبه ده
قالي والله يا نادين ما انا عارف انا هقعد معاه بس المشكله مين هيعمل الاكل
رديت عليه بتلقائيه وقولتله هاتلي الحاجة معاك وانا هعمل الاكل
قالي باستغراب هتطبخي في الشركة يا نادين
قولتله طب المفروض اعمل ايه يا استاذ مصطفي
قالي والله ما انا عارف عامه اكتبي الحاجة اللي انتي عايزاها وانا هجيبها وانا جاي
كتبتله الحاجة وسابني ومشي كانت الموظفين جت وبدأو يسألو هو فيه ايه وعرفو ان سيف تعبان بس انا منعت اي حد يدخل عنده ودخلت وبدأت اعمله كمدات لحد ما مصطفي جه
بدلت مع مصطفي وهو اخد مكاني وانا قومت روحت المطبخ وبدأت اعمله شوربه كنت بعمله الاكل وحاسه اني بعمل الاكل لجوزي لروحي لنفسي وكنت قلقانه عليه وخايفه اول مرة احس بالاحاسيس دي قلبي اللي كان علي طول مقفول ومحدش قدر يحتله ليه يا سيف اقتحمتني وخليتني احبك بس وانا بفكر كلامه جه في بالي وهو بيقول متسيبنيش يا ضحي حسيت بالم في قلبي ودموعي ملت عيني حاولت امسح دموعي وابان طبيعيه كنت كل شويه ادخل اطمن عليه الاقيه نايم
خلصت الاكل وجبته ودخلت بيه المكتب لاقيته صاحي وقاعد مع مصطفي وكان بيحكيله كل اللي حصل اول ما شوفته قاعد قولتله بفرح الف سلامة عليك يا استاذ سيف
رد عليا بتعب وقال الله يسلمك يا نادين انا مش عارف اشكرك ازاي
قولتله حضرتك متشكرنيش ده واجبي يا استاذ سيف المهم انك تكون بخير واتفضل الشوربه دي تخلص كلها
رد مصطفي بمرح وقال علي فكرة نادين هي اللي عامله الشوربه والفراخ دول يعني لو جرالك حاجة انا مش مسئول
ضحكنا كلنا ورد عليه سيف وقاله كفايه بس تعبها ووقفتها علشان تعملها
قولتله طيب دوق واحكم يارب تعجبك واستأذنت وكنت همشي
لاقيت مصطفي بيقولي استني هنا مش لما يدوق الاول دوق ياعم وقولنا رئيك في بنات اليومين دول بيعرفوا يطبخوا ولا هيجوعونا
بدأ استاذ سيف يدوق الشوربه ولاقيته بيبتسملي وبيقولي بجد تسلم ايدك يا نادين بسم الله ماشاء الله
لاقيت مصطفي بياخد منه المعلقه وبيقوله دوقني كده
لاقيت سيف بيقوله امشي انا اللي عيان ولا انت ومصطفي صمم انه يدوقها وفعلا داقها ولاقيته بيقولي واااااااااااو ايه الشوربه الجامده دي
قولتله انا معملتش حاجة وبعدين دي شوربه
قالي بس بجد طعمها يهبل
قولتلهم الف هنا بعد اذنكم اشوف شغلي
لاقيت سيف بيقولي نادين الغي بقي كل مواعيد انهارده
قولتله حصل يا استاذ سيف
قالي بابتسامة يا بختي بيكي
حسيت ان الارض كلها بتدور بيا ومش قادرة اقف استأذنت بسرعه وخرجت .. روحت قعدت علي مكتبي وافتكرت ايميل امبارح طبعته تاني ودخلت بس وانا داخله سمعت اسم ضحي حسيت ان جسمي كله اترعش حسيت بخوف بقلق بتوتر بس حاولت اتمالك نفسي واعصابي دخلت وقولتله علي الايميل فرح اوي وقالي بجد طيب بسرعه يا نادين راسليهم وخليهم يحددوا معاد
قولتله حاضر يا استاذ سيف
رجعت علي شغلي وبدأت بمراسله الشركة وتحديد معاد بس بجد كنت خايفه علي نبته الحب اللي في قلبي .. خايفه انجرح اوي من سيف .. كنت كل ما اخد قرار لازم ارجع فيه .. مش عارفه سيف عمل فيا ايه .. حبيت فيه وقاره وهيبته وحنيته وطيبته .. كان بيتعامل معانا كاننا اخواته .. كنت بحس فيه دايما انه اعظم انسان شوفته في حياتي .. كان نفسي اقرب منه واعرف ماله .. كان كلامة دايما في وداني مش عارفه ليه بالرغم من كل الكلام اللي سمعته الا اني مصممة علي حبي ليه ومش قادرة استغني عنه .. نهيت شغلي وخلصت مواعيد العمل واطمنت علي سيف ان مصطفي هيقعد معاه ومشيت
روحت البيت مجهده جدا من التفكير يمكن مكنتش انا اللي مجهده ده قلبي .. قلبي اللي محتار في كل حاجة بتحصلي .. قلبي اللي واجعني انه مايبقاش بيحبني ولا حتي بيفكر فيا واني مجرد سكرتيره وبس .. بس كانت حاجة جوايا بتقولي كفايه انه قريب مني .. بس دايما جوايا سؤال مش لاقياله تفسير مين ضحي .؟
الفصـــــل الثـــــآمــــــــــن
مر عليا الليل بين تفكير وقلق وخوف وحيره .. كنت بتصل اطمن علي سيف علي طول وما صدقت النهار طلع قومت بسرعه لبست هدومي ونزلت وانا نازله اتصلت بمصطفي بس كان بيرد عليا وهو نايم بلغته اني في الطريق وقالي ماشي يا نادين وانا ماشيه اشتريت فطار لسيف ومصطفي مش بقولكم حاسه انه يخصني بجد ومش عايزه حاجة من الدنيا غير راحته
وصلت الشركة وخبطت فتحلي مصطفي وهو بيفرك في عينه
قولتله صباح الخير
قالي صباح النور
دخلت حطيت شنطتي ع المكتب ودخلت المطبخ وقولت لمصطفي يصحي استاذ سيف .. دخلت المطبخ حضرت الفطار ودخلت اوضه المكتب بعد ما سمحولي اني ادخل طبعا كالعاده المكتب مكركب وخاصه اني مروقتهوش بقالي يومين حطيت الفطار
لاقيت استاذ سيف بيقولي ايه يا نادين ده
قولتله ده فطار اكيد جعانين وعلشان اتوه في الكلام قولتله حضرتك عامل ايه دلوقتي
قالي الحمد لله احسن بكتير
قولتلهم طيب افطروا عقبال ما اعملكم الشاي
لاقيت مصطفي بيقولي طيب مش هتفطري معانا
قولتله سبقتكم الف هنا وسيبتهم ومشيت بس سمعت مصطفي وانا ماشيه بيقول جدعه اوي البنت دي طول الليل بتتصل تطمن عليك
كنت حاسه اني همو…..ت….. من كسوفي .. دخلت المطبخ عملت الشاي وودتهلهم لاقيت سيف بيقول لمصطفي انت اخدت ع القاعده هنا ولا ايه يلا علي مكتبك
مصطفي قاله لاء مكتب مين انا هروح ياعم اخدلي دش افوق وابقي اجي بكرة بقي انت تحمد ربنا اني قعدت معاك اصلا
ضحكله سيف وقاله واطي طول عمرك
مصطفي بصلي وقالي شاهده بعد اللي عملته علشانه بيهزقني
قولتله معلش انتو مالكوش الا بعض
قالي مصطفي علشان خاطرك بس يلا امشي انا بقي
مشي مصطفي وسابني مع سيف بس وهو ماشي قفل الباب وراه روحت انا وفتحته لاقيت سيف متكلمش وكانه اتعود ان الباب يكون مفتوح
قولتله بعد اذنك يا استاذ سيف ممكن بس حضرتك تروح اي اوضه تانيه عقبال ما اروق المكتب
بصلي وقالي حاضر بس اقعدي الاول عايز اقولك حاجة
حسيت ان قلبي كان بينبض جامد انا كنت حاسه انه سمع ضر…بات قلبي ووشي الحراره زادت فيه
لاقيت سيف بيقولي انا اسف بجد علي المعامله اللي عاملتك بيها وبالرغم من كده انتي عاملتيني احسن معامله واهتميتي بيا وبتعبي
قولتله حضرتك متشكرنيش علي حاجة ده واجبي واي انسان معرض للضغط وكلنا بنمر بظروف صعبه وده شغلي وواجبي اني استحملك
قالي بجد انتي كل مرة بتعلي في نظري انسانه بجد محترمة ومالقتش زيها انا بجد متشكر يا نادين علي كل حاجة انتي عملتيها
قولتله بجد هزعل لو شكرتني علي حاجة تاني انا مش بعمل كده علشان تشكرني ويلا بعد اذنك اتفضل في مكتبي لحد ما اروق المكتب علشان شكله ميشجعش علي شغل
قالي بابتسامة صافيه جميله حاضر
طلع سيف قعد في مكتبي وانا بدأت اروق المكتب واعلقله هدومه واوضب السرير وانا بشيل المخده شميت فيها ريحته وضميتها ليا بس رميتها من ايدي واستغفرت ربنا مش من حقي نزلت مني دموعي غصب عني حسيت اني بعصي ربنا وان حتي الاحساس اللي جوايا حرام مكنتش عايزه حاجة غير ان ربنا يبقي راضي عليا علشان يديني اللي بتمناه روقت المكتب بسرعه وخرجت كان وشي كاسيه التوتر والخوف من ربنا طلعت مكتبي لاقيته قاعد يلعب في الكمبيوتر بتاعي وقالي خلصتي قولتله ايوه خلصت
بصلي وقالي مال وشك
قولتله بنبره حاده مافيش اتفضل حضرتك مكتبك بقي كويس
دخل وهو مستغرب تصرفي دخلت اتوضيت ودخلت اوضه وقفلت علي نفسي وصليت وبكيت وانا بصلي ودعيت ربنا انه يحفظلي قلبي ويشيل حبه من قلبي دعيت ربنا انه يغفرلي ذنبي علي ضعفي بكيت وبكيت لحد ما حسيت اني غسلت قلبي من الذنب
فتحت الباب وخرجت لقيت استاذ سيف واقف علي مكتبي وبيقولي كنتي فين يا نادين
قولتله بصوت مخنوق كنت بصلي
قالي بنظره متفحصه تقبل الله عملتي ايه مع الشركة
قولتله راسلتهم وقالو هيحددوا معاد ويبلغونا بيه
بصلي اوي وقالي نادين انتي تعبانه
قولتله بتماسك لا ابدا مش تعبانه ولا حاجة
قالي بعدم تصديق ماشي سابني ودخل مكتبه وانا قعدت علي مكتبي ومسكت مصحفي وقعدت اقرا شويه حاجة تهدي قلبي وتخليني اهدي واعرف افكر
وانا بقرأ لاقيت خالد جاي عليا مكتبي استمريت في قرايتي ولا كأنه موجود
لاقيته بيقولي بسخريه ايه ياعم المؤمن سيف واخدك خالص ومهتميه انتي بيه اوي
صدقت وقفلت المصحف واستغفرت ربنا ومردتش عليه
بس حاول يستفزني و قالي يعني يبقي لينا من الحظ جانب ولا هو سيف وبس
بجد كنت هنفجر فيه لولا التليفون اللي رن خلاني اهدا شويه ببص في التليفون لاقيتها سماح بعد ما رديت عليها وسلمت عليها لاقيتها بتقولي انا بتصل بيكي علشان تأكدي علي استاذ سيف معاد فرحي وهستناكي وهزعل لو مجتيش باركتلها وقولتلها ان شاء الله هاجي
قفلت معاها ودخلت قولت لاستاذ سيف قالي كويس انك فكرتيني ده انا كنت ناسي خالص
خرجت من عنده وبلغت الشركه كلها بفرح سماح
نهيت شغلي وروحت وانا بجد تعبانه ومرهقه وبالرغم من تعبي وارهاقي الا اني مكنتش قادرة اتحمل الضغط اللي انا فيه فتحت الكمبيوتر وكلمت اسما واعتذرتلها علي تقصيري معاها بجد بس حسيت اني مخنوقه اوي ومحتاجة اتكلم حكتلها علي كل اللي جوايا وكل المخاوف اللي انا فيها بدأت تهديني وتقولي لازم تقوي قلبك علشان تقدري تستمري ع الوعد اللي خدتيه مع ربنا ان قلبك ملك ربك لحد ما تلاقي اللي يصونه بالحلال بجد حسيت براحة بس في نفس الوقت خايفه اضعف تاني لما بشوفه بحس بحاجات عمري ما حسيتها حاولت اسما تاخد بايدي ع الطريق الصح من تاني وتقويني وقالتلي قومي ارتاحي وبطلي تفكير فعلا كنت محتاجة احس براحة محتاجة ادخل في غيبوبه شويه ارتاح بيها من الدنيا
صحيح حياتي بقي فيها جديد وبقيت بفكر بس بجد تعبت من كتر التفكير ومبقتش قادرة استحمل بس قررت ان تعاملي معاه هيبقي في حدود الشغل ولازم ارجع لعهدي مع ربنا
بس كان سؤال شاغل بالي وتفكيري ياتري هقدر ؟