سكرتيرة ولكن

الفصـــل الثــآلــث عشـــــــر

كانت الايام بتمر عليا وتعلقي بسيف بيزيد واهتمامي بيه بيزيد .. بس بالرغم من حيره قلبي اللي كانت معانداني ومش مرسياني علي شعوره الحقيقي تجاهي .. الا اني بجد كنت فرحانه باختياري لاني لاقيت الانسان اللي كنت بدور عليه .. صحيح انا مش عارفه احساسه ايه ناحيتي بس كل ده مش مهم .. المهم اني قريبه منه وكنت عارفه وواثقه ان ربنا مش هيخيبني ابدا لاني حبيت وفي نفس الوقت حافظت ع نفسي واني معملش حاجة تغضب ربنا مني .. وانا عارفه ان الحب مش حرام انا عمري ما تعاملت مع سيف بجرأه ولا تعاملي معاه كان بيخالف شرع ربنا .. انا كنت بتعامل معاه علي انه مديري بس حبه بيكبر في قلبي والحب ده كان بيني وبين نفسي مكنتش ببينه غير بالاهتمام
كنت براعي ربنا في نفسي وفيه .. انا كان نفسي الحب ده يتخلله الزواج بس اعمل ايه اروح اقوله تعالي اتجوزني مكنش ينفع للاسف المجتمع اللي احنا فيه مش هيقبل بحاجة زي كده وهيبصلي علي اني انسانه رخيصه مع ان ربنا كرمني وخلاني غاليه .. قررت اني اخبي الحب ده في قلبي لحد ما اشوف نصيبي مكتوب فيه ايه
مكنتش بعمل حاجة غير اني بدعي ربنا انه يبقي من نصيبي .. واكيد ربنا هيحققلي مطلبي .. مش ربنا بيقول ادعوني استجب لكم وانا بدعي ان ربنا يجمعني بيه في الحلال ومش عايزه غير الحلال
علشان كده قررت اني مش هعمل حاجة غير اني ادعي ربنا علشان يحققلي اللي بتمناه

في يوم كنت بشتغل انا وسيف في مكتبه كان بيمليني رد علي ايميل لشركة المفروض ان احنا هنقدم عروض احنا وشركات تانيه وهما هيختارو افضل الشركات وافضل العروض اللي هيدوهم التوكيل الخاص بيهم في مصر لان الشركة كانت اجنبيه في احدي الدول الاوروبيه وكانت عايزه شركات استيراد يدوهم البضاعه بتاعتهم يوزوعوها في مصر والدول العربيه
سيف الفتره دي مكنش متظبط خالص لانه بقي مقيم اقامه كامله في الشركة ونادرا لما بيروح حتي لو روح البيت بيرجع يبات في الشركة .. بصراحة مكنتش عارفه ايه السبب بس قررت اني اسأله
استاذ سيف هو ليه حضرتك بقيت مقيم في الشركة ومش بتروح
لاقيته بيبصلي وبيقولي والله يا نادين انا تعبت من البيت وانا مبعرفش اقعد في حته مش نضيفه وبصراحة البيت مش نضيف خالص
قولتله باستغراب طب ليه حضرتك مش بتجيب حد ينضفلك البيت
قالي كانت في واحدة بتيجي بس هي ست كبيره وكانت بتيجي من ايام ماما الله يرحمها وكانت عارفه البيت وعارفاني وانا كنت بثق فيها وكانت بتيجي كل اسبوع مرة بس للاسف كبرت في السن وتعبت ومبقتش قادرة تشتغل وانا مبحبش اي حد يدخل بيتي بصراحة انا مهمل شويه والاوراق بتبقي مرميه هنا وهنا وانا مش بسهوله بثق في حد
قولتله طيب حضرتك ممكن تجيب واحدة تانيه تنضف وحد يبقي معاها
لاقيت في عينه نظرة حزن وقالي انا بطولي في الدنيا دي يا نادين هجيب مين يقعد مع اللي بتنضف وانا طبعا مينفعش اكون في البيت
فكرت شويه وقولتله طيب حضرتك بتثق فيا
قالي بدون اي تردد اه طبعا يا نادين
قولتله طيب حضرتك شوف واحدة وانا هبقي معاها
بصلي باستغراب وقالي بس ده مش شغلك
قولتله انا سكرتيره حضرتك والمسئوله عنك وعن الشغل وعن مزاجك لازم حضرتك ترتاح علشان تعرف تشتغل وده تخصصي
بصلي نظره عمري في حياتي ما انساها وقالي انا مش عارف من غيرك كنت عملت ايه
قولتله بضحكة خفيفه كنت احتاست من غيري علشان بس تعرف قيمتي
قالي عارفها ومقدرها انا مستحيل استغني عنك
بالرغم من ان الكلمه كانت عاديه ومتحملش اي معني الا اني اتأكدت اني خلاص بقيت جزء من حياه سيف وبقيت واثقه انه ميقدرش يستغني عني
فعلا سيف اتفق مع البواب يجيبله واحدة تنضفله الشقه واداني في اليوم ده اجازه واداني العنوان مع انه الح عليا كتير انه ع الاقل يوصلني بس انا رفضت وهو قبل ده واحترم رغبتي جدا قابلته عند باب بيته اداني المفتاح وقالي اقفلي علي نفسكم ولو حد خبط مهما كان متفتحيش ولو احتجتي اي حاجة نادي ع البواب ولو احتجتي مني حاجة كلميني وهتلاقيني قدامك وانا مش هاجي البيت غير لما تقوليلي انك مشيتي وخلي المفتاح معاكي هبقي اخده منك بكرة في الشركة اه ومتخليهاش تعمل اكل لاني مش بحب اكول من ايد اي حد
فعلا طلعت انا والشغاله اول حاجة دورت عليها هي المطبخ لاني قررت اعمل لسيف اكل يكفيه فتره لاني مكنتش بعرف اعمله حاجة في الشركة وكنت خايفه عليه من اكل الشارع بس زي ما توقعت مالقتش اي حاجة في التلاجة
كتبت الحاجة اللي محتاجها في ورقه ونزلت انا والشغاله واشترينا كل طلبات البيت .. كان ممكن ابعت البواب بس بصراحة حبيت انقي كل حاجة واجيب كل حاجته بايدي .. حسيت انه بيتي ومش عايزه حد يشاركني فيه
رجعت بعد ما اشتريت كل حاجة من السوق .. وبدأت الشغاله تروق الشقه وانا كنت في المطبخ بعمل الاكل .. عملت اصناف كتير اوي بس طبعا كميات قليله علشان تكفيه وفي نفس الوقت متبوظش .. انجزت في وقت قليل جدا الحمد لله كنت سريعه .. كانت الشغاله تقريبا خلصت كل الشقه مكنش قدامها غير اوضه النوم
قولتلها متعمليش اوضه النوم انا هعملها
مكنتش بحب اي حد يهتم بحاجة سيف الخصوصيه الا انا .. فعلا بدأت انضف اوضه النوم وكمان شغلت الغساله علشان اغسل هدومه .. كنت بنضف كل ركن وحاسه انه بيتي وجوزي ولازم يجي من شغله يلاقي كل حاجة تمام .. حسيت باحساس عمري ما حسيته بجد قبل كده .. حسيت اني ست البيت ده ومن حقي التصرف فيه زي ما يحلالي .. بصراحة غيرت كمان في نظام الشقه حبيت اغير حياه سيف وخصوصا في بيته مكان راحته .. كان لازم يجي يلاقي ليا لمسه خاصه في البيت كل ركن في البيت يبقي ليه لمسه خاصه .. كل ما يشوف حته في الشقه يبقي عليها طابع الخاص بنادين
وانا ببص في الشقه لاقيت صور تجمع سيف مع باباه ومامته ولاقيت صورة لضحي علي الكمود اللي جمب سرير سيف صورة كانت جامعه بين سيف وضحي يوم فرحها .. كانت تشبه سيف اوي وكان بينهم موده بس ايه السبب ومهما كانت المشاكل عمرها ما تبقي كده ولا بالقسوه دي الا لو كانت حاجة كبيره كان بجد نفسي سيف يحكيلي يمكن اقدر اساعده
فوقت من شرودي علي صوت الشغاله وهي بتقولي انها خلصت كل حاجة
قولتلها طيب وحاسبتها ومشيت ومحدش فضل في البيت غيري بدأت انظم البيت وارص الاكل ع السفره وغطيته وكتبت ورقه ع السفره حطتها في نص الاكل وكتبت فيها ” يارب الاكل يعجبك .. علي فكرة غسلت ايدي كويس قبل ما اعمله .. نادين ”
اتصلت بيه وقولتله اني خلصت وفعلا مشيت قبل ما يجي
كنت فرحانه ومبسوطة اوي بالرغم من اني كان نفسي اشوف رده فعله واشوف الفرحة والسعاده علي وشه الا اني بس اكتفيت باني اكون سبب سعادته بس قبل حتي ما اروح البيت لاقيت التليفون بيرن ببص علي الشاشه لاقيت مكتوب سيف
فتحت الخط واول ما فتحته لاقيته بيقولي ربنا ما يحرمني منك يا نادين دايما بتسعديني
حسيت بجد اني طايره من الفرحة ومكنتش عارفه ارود بس حاولت اتمالك نفسي واهدي قلبي اللي بدأ يدق جامد وقولتله كفايه بس عليا اشوفك سعيد
قالي بجد كل يوم بتزيدي تعلقي بيكي وبتخليني مش قادر حتي افكر اني استغني عنك
فرحت اوي بكلامه وقولتله المهم بس يكون ترتيب البيت عجبك واكلي كمان
قالي انا لسه مدوقتش الاكل بس كفايه انك تعبتي نفسك وعملتيه
قولتله الف هنا عليك
قفلت معاه ومسكت التليفون في الشارع وحضنته كنت ماشيه بضحك حسيت ان الناس كلها بتبص عليا بس كنت اسعد انسانه في الكون اليوم ده

الفصــل الــرآبــع عشــــر

تاني يوم قومت روحت الشركة قبل معادي بشويه صغيره .. فتحت الشركة وروقت مكتب سيف ورشيت معطر جو .. وطلعت مكتبي وفتحت الكمبيوتر بتاعي بس بصراحة مكنتش مركزة في اي حاجة .. بعد حوالي 5 دقايق لاقيت سيف داخل وبيقولي صباح الخير
بصتله بابتسامة وقولتله صباح النور
اول مرة اشوف وش سيف مشرق كده من فتره
قالي لو سمحتي يا نادين تعاليلي المكتب
قولتله حاضر
دخلت المكتب وراه وطبعا كالعاده سيبت الباب مفتوح وكمان لان مكنش حد من الموظفين لسه جه
وقفت قدامه وقولتله تحت امرك يا استاذ سيف
قالي اولا شكرا جدا ليكي علي كل اللي انتي عملتيه وبتعمليه علشاني انا بجد مبقتش عارف اعملك ايه اوفيكي حقك انا والله مهما عملت ليكي مش هعرف بس ارد جزء من جمايلك عليا
قولتله علي فكرة انا مش بعمل كده علشان تشكرني وقولتلك ان ده جزء من تخصصي اني بس اخليك مرتاح علشان تعرف تدي في شغلك وبدون قصد مني قولت وكفايه عليا اشوف الابتسامة دي منورة وشك
بجد اتحرجت اوي من نفسي بعد ما قولت الجمله الاخيره بس كنت حاساها اوي وكنت اسعد واحدة علشان بس قدرت اشوف الابتسامه الصافيه والوش المشرق ده
لاقيته بيقولي ربنا يخليكي يا نادين انا فعلا اختارت صح وده من حب ربنا ليا ان وقف انسانه زيك في طريقي
بجد كنت محرجة ومعرفتش اتكلم ولا ارد عليه
لاقيته بيخرج فلوس وبيدهالي
قولتله باستغراب ايه دول
قالي ده المبلغ اللي انتي جبتي بيه الاكل انا مش عارف هو كده ولا ازيد شوفي كده لو ازيد قولي
قولتله ومين قالك اني هاخد الفلوس دي
قالي ده حقك كفايه تعبك معايا
قولتله بحزن بس انا مش هاخد الفلوس دي ومهما عملت مش هاخدها
قالي ده بيتي واي حاجة تيجي فيه لازم ادفع تمنها
كان نفسي اوي اقوله مش بيتك لوحدك يا سيف ده بيتي انا كمان اللي حسيت بالراحة فيه اول ما دخلته اللي اتمنيت اعيش معاك فيه
لاقيته خرجني من شرودي وهو بيقولي مش هفضل مادد ايدي كده كتير ع فكرة
قولتله خلي فلوسك يا استاذ سيف علشان انا بجد مش هاخودها بعد اذنك
سيبته ومشيت وانا بجد زعلانه اوي منه اه هو اتصرف صح وبكل زوق بس كمان مينفعش يحاسبني علي حاجة جبتها اصلها خلاص جت
روحت عملتله القهوه وفتحت شنطتي وطلعت منها السندوتشات ليه .. اصل انا كنت عملاله سندوتشات وجايباهم معايا ليه علشان يفطر
دخلتله تاني وحطيت قدامه الفطار
قالي ايه ده بقي
قولتله الفطار
لاقيته بيبصلي اوي وبيقولي طب انا اعمل ايه طيب علشان بس ارد جمايلك دي .. بجد يا نادين كنت علي طول لوحدي بس من ساعه ما دخلتي الشركة دي وانا حاسس اني مش لوحدي
ابتسمت وقولتله ميرسي يا استاذ سيف بس مقولتليش ايه رئيك في الاكل بعرف اطبخ ولا لاء
قالي بصراحة الاكل كان وهم انا كان بقالي كتير مكلتش اكل بيتي لما معدتي كانت خلاص بس انتي عرفتي منين الاصناف اللي انا بحبها
قولتله انا والله قعدت ادعي واقول يارب بس يكون بيحب الاصناف دي كنت خايفه اوي
قالي لاء اطمني انا مباقولش ع الاكل لاء امي الله يرحمها كانت معودانا منقولش علي حاجة لاء
قولتله بحزن الله يرحمها
قالي علي فكرة ترتيبك للبيت الجديد يجنن برضه الست في البيت حاجة تانيه يا بخت جوزك بيكي
قولتله بكسوف ان شاء الله لما يجي بقي
قالي ان شاء الله يجي بس اوعي تسيبينا
بجد حسيت اني مخنوقه اوي حسيت اني مش في دماغه اصلا حسيت اني مجرد سكرتيره وبس
لاقيت دموعي ملت عنيا وقبل ما تفضحني استأذنت منه وخرجت
دخلت اوضه وقفلت علي نفسي ووقفت قدام المرايه كنت اول مرة ابص علي نفسي من فتره كده باهتمام انا عارفه اني اهملت في نفسي وكمان بعد ما كنت خدت قرار اني هعمل ريجيم ارادتي ضعفت جامد ومبقتش بهتم .. بصيت للمرايه وقولت يعني هو هيبصلي ع ايه انا مش حلوة ولا شكل ولا منظر .. بس انا طول عمري نفسي واحد يحبني من جوايا .. بس كمان لازم شكلك يعجبه .. يارب انت اللي عالم بحالي وعالم بحبي ليه يارب قربني منه وقوي عزيمتي وخليني ابقي حلوة في عنيه
فضلت دموعي تنزل مني واخدت قرار اني بجد لازم اهتم بنفسي علشان نفسي وعلشان سيف
رجعت مكتبي وانا بحاول ابقي قد القرار .. روحت مكتبي وفضلت قاعده اعمل شغلي ولاقيت خالد جي لاقيته بيقولي باسلوب ساخر ايه كنتي فين امبارح .. محدش شافك
قولتله وانت من امتي بتهتم بيا موجوده ولا مش موجوده شئ يخصك
قالي انا بس كنت خايف عليكي تكوني حصلك حاجة مع انك يعني مفيش حاجة ممكن تأثر فيكي
مفهمتش هو بيرمي لايه فضلت ساكته ومبرودش عليه
قالي يا بنتي بلاش التناكه اللي انتي فيها دي انتي تحمدي ربنا
بصراحة بصتله نظرة اول مرة احس بالقوه دي وقولتله اتفضل علي مكتبك يا اما هقول لاستاذ سيف
قالي هو انا هخاف بكرة تشكريني
انا بجد كنت تعبت من البني ادم ده عمري ما فهمت هو بيرمي ع ايه ولا عايز ايه انسان خبيث لابعد حد
شويه ولاقيت استاذ مصطفي جاي وبيسال علي سيف بلغته انه في مكتبه ودخله
استاذ مصطفي نادرا لما بيجي الشركة .. هو مسئول الحسابات وعنده مكتب محاسبه خاص بيه وصديق استاذ سيف .. وحتي لما بيجي محدش بيحس بوجوده وده لان مكتبه متطرف جدا عن الشركة كلها ونادرا لما بيتقابل هو وسيف جوه الشغل
اول ما جه ودخل لاقيت داليا جايالي وقاعده معايا علي مكتبي ودي اول مرة داليا تفكر حتي تكلمني او تيجي مكتبي الا لما بتكون عايزه حاجة من سيف داليا هي مسئوله المبيعات
بصتلها باستغراب وقولتلها خير يا انسه داليا اول مرة تيجي مكتبي
بصتلي بعدم تركيز هاه اه اصل انا عمري ما اتعرفت عليكي قولت اجي كده واتكلم معاكي
بصراحة كنت مستغرباها بس من ساعه فرح سماح وكانت بتبص علي مصطفي استشفيت انها ممكن تكون بتحبه
قولتلها تنوريني بس احنا في شغل ولو استاذ سيف خرج ولاقاكي قاعده كده هيزعق
قالتلي هو مين اللي دخل لاستاذ سيف من شويه
قولتلها ده استاذ مصطفي
قالتلي بقالو كتير اوي ماجاش الشركة من ساعه تعب استاذ سيف
قولتلها اه علشان شغله
قالتلي اه الله يكون في عونه وفضلت قاعده ساكته بصراحة سيبتها وشوفت شغلي
اول ما لاقيت الباب بيتفتح وخرج منه مصطفي عملت انها بتدور علي حاجة في مكتبي ووقفت قدام مصطفي وقالتله ازيك يا استاذ مصطفي وحشتنا
بصلها وقالها الحمد لله تمام ووجه كلامه ليا وقالي نادين عايزك لو سمحتي في مكتبي
قولتله حاضر
كان هيمشي بس داليا وقفته قالتله هو حضرتك مش بتيجي ليه
قالها معلش ظروف بعد اذنك يا داليا علشان عايز نادين في موضوع مهم
راح المكتب وانا روحت وراه وخليت الباب مفتوح
قالي اقعدي يا نادين
قولتله تحت امرك يا استاذ مصطفي
قالي سيف حكالي ع اللي انتي عملتيه علشانه وبصراحة انا بجد بيشكرك من كل قلبي لانك الوحيده اللي وقفتي جمبه حتي انا تعبت منه ومن مشاكله بس كان غصب عني انا ربنا وحده يعلم كميه المشاكل اللي عندي
قولتله يا استاذ مصطفي استاذ سيف غالي اوي علينا واكيد لازم نهتم بيه كلنا عمره ما عامل حد وحش ولا كانه مدير شركة بالعكس بيعاملنا علي اننا اخواته
قالي انا عارف يا نادين وانا عارف انك انسانه محترمة وكنت بس عايز اقولك ياريت تهتمي بسيف ومفيش يوم تزهقي منه ولا من مشاكله سيف بجد محتاج اللي يقرب منه
قولتله من غير ما تقول يا استاذ مصطفي
قالي ياريت تقدري لان سيف بيمر بازمة نفسيه
بصتله باستغراب وقولتله ازمة نفسيه ازاي
قالي انا مش هقدر اقولك تفاصيل بس كل اللي هقدر اقولهولك انك تقريبا قدرتي تعالجي سيف من غير ما تاخدي بالك
قولتله انا مش فاهمه حاجة
قالي صدقيني هتعرفي كل حاجة في وقتها وسيف هو بنفسه اللي هيحكيلك ويوم ما يحكيلك اعرفي ان سيف عدي الازمة دي بنجاح وكنتي انتي السبب في علاجه
قولتله طيب المفروض اعمل ايه
قالي متعمليش اي حاجة وياريت بلاش الموضوع ده يأثر باهتمامك بيه او تزودي اهتمامك خليكي عاديه جدا واتعاملي زي ما كنتي بتتعاملي قبل كده اتفقنا
قولتله اتفقنا
خرجت من المكتب وانا مش فاهمه بس كل ده ميهمنيش ميهمنيش غير ان سيف يبقي كويس وبس